Хантарааҕынан сулууспаҕа кэлии омуктар эмиэ барыахтарын сөп

РФ Оборуонаҕа министиэристибэтэ саппааска олорор байыаннай исписээлинэстээх дьону хантараак дуогабарынан аармыйа кэккэтигэр сулууспаҕа ыҥыра турар. Маннык сулууспаҕа өрөспүүбүлүкэ олохтоохторун сэргэ араас төрүөтүнэн Саха сиригэр кэлэ сылдьар омуктар эмиэ хантараак түһэрсиэхтэрин сөп.

Бу туһунан биһиги Дьокуускай куоракка хантарааҕынан байыаннай сулууспаҕа (3 разряд) сүүмэрдиир пуун старшай инструктора, старшай прапорщик Алексей Михайлович Колесовы кытта кэпсэттибит.
— Күн бүгүн биһиги дойдубут судаарыстыба тыын интэриэһин туһугар Украинаҕа ыытар байыаннай эпэрээссийэтигэр РФ Сэбилэниилээх күүстэрин кэккэтигэр баҕа өттүнэн хантараак түһэрсэн, сулууспалыы барааччыларга уонна кинилэр дьиэ кэргэттэригэр судаарыстыба, нэһилиэнньэ, уопсастыбаннас өттүлэриттэн болҕомто, кыһамньы, өйөбүл улахан. Байыаннай эпэрээссийэҕэ ким баҕарар хантараак дуогабарынан баран сулууспалыан сөп.
Ол курдук, бастатан туран, 60 саастарыгар диэри саастаах дьон итиэннэ доруобуйаларын туругунан байыаннай сулууспаҕа сөптөөх А, Б, В категорияларга хапсар, 9 кылаастан саҕалаан үөрэхтээх дьон байыаннай сулууспаҕа хантараак түһэрсиэхтэрин сөп. Онон 59 саастарыгар сылдьар дьон, сорох түгэҥҥэ 65 саастарыгар диэри да саастаахтар туһааннаах байыаннай исписээлинэстээх, бэлэмнээх буоллахтарына, байыаннай сулууспаҕа хапсыахтарын сөп. Чэпчэки эбэтэр ыарахана суох орто ыстатыйаларынан сууттаммыт дьон хантарааҕынан сулууспаҕа ылыллыахтарын сөп. Итинник ыстатыйанан сууттана, олоро сылдьыбыт дьоҥҥо өрөспүүбүлүкэ буруйун амнистиялыырга туруорсан, буруйун сотторуон сөп.
Хантарааҕы түһэрсибит байыаннай сулууспалаахтарга социальнай чэпчэтиилэр уонна мэктиэлэр көрүллэллэр. Бойобуой дьайыы бэтэрээнин анал туруга иҥэриллэр уонна онуоха тоҕоостоох чэпчэтиилэр бааллар. Бу туһунан сонуннары киэҥник тарҕатар ситимнэринэн элбэхтэ сырдатыллыбыта.
Иккиһинэн, байыаннай эпэрээссийэҕэ Саха сирин олохтоох омуктара эрэ буолбакка, манна атын сиртэн кэлбит омуктартан хантарааҕынан сулууспаҕа барааччылары кытта үлэ эмиэ ыытыллар. Кинилэр хантарааҕынан байыаннай сулууспа туһунан, байыаннай сулууспа иһин көрүллэр чэпчэтиилэр, төлөбүрдэр тустарынан интэриэһиргииллэрин быһааран биэрэбит. Хантарааҕынан барыахтарын иннинэ эрдэ барытын билэллэрэ бэйэлэригэр үчүгэй. Ол кэннэ доруобуйаларын туругун көрүүнү ааһаллар, хантараах түһэрсэллэр. Биһиги бу үлэбитигэр федеральнай миграционнай сулууспа Саха сиринээҕи управлениетын кытта бииргэ үлэлиибит. РФ Президенин саҥа тахсыбыт Ыйааҕынан дойдубут тас өттүттэн кэлэр омуктарга Арассыыйа гражданствотын ылыы чэпчэтиллэн турар. Ол быһыытынан хантараак түһэрсэр омуктар уонна кинилэр дьиэ кэргэттэрэ биһиги дойдубут гражданствотын судургутук ылар кыахтаннылар.

Байыаннай сулууспаҕа хантарааҕы түһэрсии (3 разряд) туһунан ким баҕарар Дьокуускай куорат, Чепалов уулуссатын 23-гэр баар 6 №-дээх кабинекка кэлэн сиһилии билсиэхтэрин эбэтэр кинилэр (4112) 32-10-40 төлөпүөнүнэн ыйыталаһан быһаарсыахтарын сөп.