Хапкидоҕа Саха сирин күрэсчиттэрэ мэтээллэргэ тигистилэр

Новосибирскайга хапкидоҕа «Азия-Сибиир» диэн ааттаах Бүтүн Арассыыйатааҕы күрэхтэһии түмүктэннэ. Саха сирин күрэсчиттээрэ ситиһиилээхтик кыттан, мэтээллэри ылары ситистилэр. Бу туһунан ЯСИА иһитиннэрэр.

Ааспыт өрөбүллэргэ, алтынньы 11-12 күннэригэр, Новосибирскайга хапкидоҕа үс күрэхтэһии буолан ааста: улахан дьоҥҥо Арассыыйа Куубага, эдэр күрэсчиттэргэ «Азия-Сибиир» Бүтүн Арассыыйатааҕы күрэхтэһиитэ уонна кыра саастаахтарга «Көлүөнэлэр ситимнэрэ» бэстибээл. Күрэхтэһиигэ Арассыыйа алта эрэгийиэниттэн 200-тэн тахса күрэсчит кытынна.

Саха сирин аатыттан Виктория Казарина салайааччылаах Мииринэйдээҕи хапкидо оскуолата кыттыыны ылла. Түмүгэр Бүтүн Арассыыйатааҕы күрэхтэһиигэ Саха  сирин күрэсчиттэрэ Максим Граур уонна Дарья Демидова кыайыылааҕынан таҕыстылар. Тимофей Сукачев уонна Антонина Бабушкина боруонса мэтээллэринэн бэлиэтэннилэр. Ону таһынан, бэстибээлгэ Мииринэйтэн икки эдэр иитиллээччи ситиһиилээхтик кытынна: Степан Хвостик бастакы миэстэни ылла, оттон Кира Лебедева үһүс миэстэҕэ тигистэ.