Хапсаҕайга күүстээх киирсиилэр буолаары тураллар

Кулун тутар 15-16 күннэригэр Дьокуускайга СӨ Гражданскай оборуона уонна нэһилиэнньэ олоҕун куттала суох буолуутун министиэристибэтин бирииһигэр хапсаҕайга алтыс күрэхтэһии быйыл «Триумф» спортивнай комплекска ыытыллаары турар. Күрэхтэһиини тэрийээччилэр 400-чэ кыттааччыны күүтэллэр.

Аһаҕас турнир үгэс быһыытынан икки бөлөҕүнэн ыытыллыаҕа. Бастакыга СӨ Быыһыыр сулууспатын, Саха сирин судаарыстыбаннай баһаарынай сулууспатын, РФ ЫБММ эрэгийиэннээҕи управлениетын, быраабы араҥаччылыыр бары уорганнар уонна да атын биэдэмистибэлэр үлэһиттэрэ кыттыахтара. Иккискэ — идэтийбит спортсменнар. Финалга бөлөхтөрүнэн бэйэлэрин ыйааһыннарыгар кыайбыттар кыһыл көмүс мэтээл иһин киирсиэхтэрэ.

Ыйааһыннарынан кыайыылаахтары уонна призердары быһааран баран, күрэхтэһии түмүгэр үгэс быһыытынан 75 киилэҕэ диэри уонна 75 киилэттэн үөһэ ыйааһыннаах бөҕөстөргө абсолютнай киирсиилэр ыытыллыахтара, кыайыылаахтарга 100 000 солк. харчынан сэртипикээттэри туттарыахтара. Маны таһынан бэйэлэрин ыйааһыннарыгар бириистээх миэстэлэри ылбыт спортсменнар наҕараадаланыахтара: 1 миэстэ иһин 30 000 солк., 2 миэстэ иһин 20 000 солк., 3 миэстэ иһин 10 000 солк.

Санатан эттэххэ, ааспыт сыллааҕы турнир абсолютнай кыайыылаахтарынан Бурятия маастара Балдан Цыжипов (75 киилэттэн үөһэ) уонна Кэбээйиттэн төрүттээх Айсен Поскачин (75 киилэҕэ диэри) буолбуттара. Кини кэнники “Аар Дархан” икки төгүллээх кыайыылааҕа буолбута.

Ону тэҥэ, күрэхтэһии түмүгүнэн, “Бастыҥ тустуук”, эр дьон уонна бэтэрээннэр ортолоругар “Бастыҥ быраҕыы”, “Кыайыыга дьулуурун иһин” уонна “Бастыҥ судьуйа” анал ааттарга бириистэр  олохтонуохтара.

Көрөөччүлэргэ киирии босхо. Күрэхтэһии бүтэһик киирсиилэрин уонна абсолютнай первенствоны  «Мамонт» ханаалынан быһа эфиргэ көрдөрүллүөхтэрэ, диэн иһитиннэрэр Sportyakutia.ru саайт.