Хаптаҕайдар тыын суолталаах боппуруостары туруорустулар

Бэҕэһээ, олунньу 13 күнүгэр, СӨ экэниэмикэ миниистирэ Петр Попов салайааччылаах бырабыыталыстыба  отчуоттуур бастакы бөлөҕө Мэҥэ Хаҥалас улууһун Хаптаҕай нэһилиэгэр үлэлээтэ. Барыта 71 олохтоох кыттыыны ылбыта бэлиэтэннэ.

Отчуот ааспыт сыллааҕы үлэ түмүктэрин сырдатар тэттик киинэни көрүүттэн, дойдубут, өрөспүүбүлүкэбит өрөгөй ырыаларын истииттэн саҕаланна.

Нэһилиэк баһылыга Иван Зыков мустубут бар дьону төрөөбүт тыл уонна сурук, бичик күнүнэн эҕэрдэлээн туран олохтоохтору отчуокка көхтөөх кыттыыны ылалларыгар ыҥырда. Улуус баһылыга Дмитрий Тихонов отчуоттуур бөлөҕү билиһиннэрдэ.

Сыллааҕы үлэ сырдатыллыбытын кэннэ тутатына ыйытыктарга, этиилэргэ киирдилэр.
Олохтоохтор ыйытыыларын, этиилэрин хото эттилэр. Ол курдук, сылгы, сүөһү иитэн, оҕуруот аһынан дьарыктанар хаһаайыстыбалар даамба тутулуннаҕына отторун хайдах, ханан тиэйэллэрин, Ыксаллаах быһыы-майгы министиэристибэтэ сыл аайы халаан уутуттан бэлэмнэнэн Өлүөнэ өрүс мууһун эрбэтэллэрэ, кумах куталлара төһө көдьүүстээҕин, суотабай сибээс тоҕо мөлтөҕүн уонна да атын боппуруостары ыйыттылар.

Нэһилиэнньэ туруорсар тыын боппуруостарынан саҥа култуура киинэ, оскуола, саҥа үйэ ирдэбиллэригэр толору эппиэттиир баһаарынай чаас дьиэтин тутууну эттилэр. Үгүс киһи Өлүөнэ өрүһү туоруур муоста тутуллуута сайдыы суола, олохпут ирдэбилэ буолар диэн эттилэр. Ол эрээри бу баараҕай тутуу нэһилиэк сирдэринэн ааһарынан айылҕабытын харыстыырга туох дьаһаллар, миэрэлэр ылыллалларын сурастылар. Муоста тутуллуутунан эппиэттээх үлэһиттэри кытта мунньах туруорустулар.  Ону тэҥэ тыыл бэтэрээннэригэр дьиэ өрөмүөнүгэр көрүллэр үп сууматын улаатыннарыыны, хас ыал аайы төрүччү оҥорорго көмө наадатын, тыыл бэтэрээннэригэр, сэрии сылын оҕолоругар ый аайы биэнсийэлэригэр эбии биэстии тыһыынча солкубай эбиллиэн наадатын бэлиэтээтилэр.

СӨ экэниэмикэ миниистирэ Петр Попов улуус салалтатын, Өлүөнэ өрүһү туоруур муоста тутуутугар үлэлиир эппиэттээх дьону кытта сөбүлэһэн баран кулун тутар  бүтүөн иннинэ, Ороссолуода уонна Хаптаҕай нэһилиэктэригэр олохтоохтору кытта мунньаҕы тэрийиэхпит диэн эттэ. Сыллааҕы отчуоту күннээҕи түбүктэн быыс булан кэлэн истибиттэригэр, долгутар боппуруостарын ыйыппыттарыгар, этиилэрин киллэрбиттэригэр олохтоохторго махталын биллэрдэ итиэннэ үүммүт сылга бигэ туруктаах олоҕу, кытаанах доруобуйаны, ситиһиилээх үлэни баҕарда.

Мэҥэ Хаҥалас улууһун дьаһалтатын пресс-сулууспата