Хара Алдаҥҥа бырабыыталыстыба отчуота саҕаланна

СӨ бырабыыталыстыбатын бэрэссэдээтэлин солбуйааччы Сергей Местников салайааччылаах бастакы бөлөх Таатта улууһугар үлэтин олунньу 8 күнүгэр Хара Алдан нэһилиэгиттэн саҕалаата.

Бу күн 54 кыраадыстаах тымныынан, туманынан будулуйан көрүстэ. Оскуола оҕолоро үөрэммэттэр. Дьиэлэр биллэ тымныйдылар. Ол да үрдүнэн, кулуупка 40-тан тахса киһи муһунна. Биллэрин курдук, бырабыыталыстыба отчуота 2019 сылтан атах тэпсэн олорон кэпсэтэр көрүҥүнэн ыытылла илик. Ол иһин этинии, кыһалҕалары туруорсуу көхтөөхтүк барда.

Сергей Васильевич өрөспүүбүлүкэҕэ ааспыт сыллааҕы үлэ-хамнас туһунан отчуотун лоп-бааччы, өйдөнүмтүөтүк, сахалыы кэпсээтэ. Кини этэринэн, өрөспүүбүлүкэҕэ оҕо төрөөһүнэ 1000 киһиэхэ 11,9 оҕо төрөөбүт, оттон Таатта улууһугар — 13,9 оҕо төрөөбүт. Өлүү ахсаана өрөспүүбүлүкэҕэ да, улууска да 1000 киһиэхэ — 8,4 киһи. 2022 сылга орто саас 70,6 сылга тэҥнэспит, ол 2021 сылга тэҥнээтэххэ, сыл аҥаарынан уһаабыт диэн эппитин хара алданнар кэрэхсээтилэр. Ону тэҥэ, Ытык Күөлгэ диэри аҕыйах сылынан аспаал суол тэлгэниэхтээҕин үөрэ иһиттилэр.