Хара нэһилиэгин эр дьоно отуттан тахса ыалы ыраас мууһунан хааччыйдылар

Бу күннэргэ ытык кырдьаҕастарга, элбэх оҕолоохторго, байыаннай дьайыыга сылдьар дьон дьиэ кэргэттэригэр көмөлөһөн, нэһилиэктэргэ муус хостооһунун үгэнэ. 

— Мэҥэ Хаҥалас улууһун Хара нэһилиэгин туруу  үлэһит  эр  дьоно  мустан, биир  санаанан  салайтаран, тутуспутунан  тэтимнээх  үлэни  тэһииниттэн  туттубут.  Отуттан  тахса  ыал  тэлгэһэлэригэр  ып-ыраас  мууһу тиэртибит,  кыһын иһэр аһыыр уунан  хааччыйдыбыт. Үтүө  үгэспит сыл  аайы  тэрээһинэ  тупсан  иһэриттэн  олуһун  үөрэбит.

Билиҥҥи  түһүүлээх-тахсыылаах, балысханнык  сайдар  олоххо, үтүө  үгэспитин  өрө  тутан, үрүҥ  күммүт  анныгар  күн  ахсын  дьоллоох  олоҕу  сомсон  иһиэҕиҥ. Сахалыы  сиэринэн  бэйэ-бэйэҕэ  хардары-таары  көмөлөһүү  истиҥи  иитэр,  доҕордуу  сыһыаны  саҕар, — диэн санаатын үллэһиннэ Харатааҕы «Айыллаан» култуура киинин исписэлииһэ, СӨ култууратын туйгуна  Виталий Очиров.