«Хара ый» үүнүөҕэ. Ол аата?

Атырдьах ыйын 22 күнүгэр “Хара ый” диэн аатынан биллэр сэдэх көстүү буолара күүтүллэр.

“Хара ыйынан” тугу ааттыылларый? Биир халандаарынай ый устата  иккис саҥа ый (новолуние) буоларын “хара ый” диэн ааттыыллар.

“Хара ый” тахсыытын араас билгэлээһини кытары ситимнииллэр. Оттон учуонайдар куттанарга, айманарга төрүөт суоҕун бигэргэтэллэр. Тоҕо диэтэххэ, “Хара ый” атын саҥа ыйдартан туох да уратыта суох.

“Хара ыйдар” быһа холоон 33 ыйга биирдэ буолаллар, аныгыскы “Хара ый” 2028 сыл атырдьах ыйын 20 күнүгэр күүтүллэр.

Ый үүнэр кэмэ судургута суох кэм, күүстээх эниэргийэлээх, сорох дьон туохтан эрэ куттанара күүһүрэр, сорох ыарыыта бэргиир, үлэлиир кыаҕа намтыыр. Ол эрээри бу саҥа дьыаланы саҕалыырга тоҕоостоох кэм.  Бу күүстээх эниэргийэлээх түүнү баҕа санаалары этэргэ туһаныахха наада.