Харах балыыһатыгар Арассыыйа Гиннеһин рекорда оҥоһулунна

2025 сылга Өрөспүүбүлүкэтээҕи офтальмологическай балыыһа тэриллибитэ 100 сылын туолар. Бу бэлиэ күнү көрсө, ахсынньы 11 күнүгэр харах балыыһатын хирурдара 2 чаас 18 мүнүүтэ иһигэр 100 киһини эпэрээссийэлээтилэр. Бу манан кинилэр ураты рекорду оҥорон, Арассыыйа Гиннеһин кинигэтигэр киирдилэр. Рекорду Гиннес кинигэтин эспиэрдэрэ кэтээн көрдүлэр, бигэргэттилэр.

Хаартыска: Андрей Сорокин, СИА.

Пациеннар улуустартан, куораттартан икки-үс күн иннинэ эрдэ кэлэн, балыыһаҕа киирбиттэрэ. Быраастар кинилэр харахтарын чинчийэн, ким эпэрээссийэлэниэн сөбүн быһаарбыттара, бэлэмнээбиттэрэ. Уустук соҕус туруктаахтары кэнникигэ хаалларбыттара. Сүрүннээн сааһырбыт дьоҥҥо катаракта тахсан эрэйдиир, улам көрбөт буолан иһэллэр. Онон бу күн катаракталарын эпэрээссийэлээтилэр, болоорбут хрусталиктарын уларыттылар. Пациеннар саастара — 60-80. Эпэрээссийэ түргэнник оҥоһуллар, онон үгүстэрэ үчүгэйдик көрөр буолан, астынан, бүгүн тута дьиэлэригэр таҕыстылар. Сорохтор иккис харахтарын сарсын эпэрээссийэлиэхтэрэ, онон балыыһаҕа хааллылар. Биир хирург ортотунан 8-10 киһини эпэрээссийэлээтэ.

Өрөспүүбүлүкэ штаты таһынан кылаабынай офтальмолога, үрдүк технологиялаах мэдиссиинэ көмөтүн отделениетын сэбиэдиссэйэ Екатерина Захарова этэринэн, эпэрээссийэни оҥоруу технологията сыллата сайдан иһэр.

— Урут биһиги катаракталаах дьону ситиэр диэри өр кэтэһиннэрэр этибит. Билигин катаракта ситэ да илигинэ, эрдэ оҥоһуллар буолла. Аны урут 10 мм диэри хайытарбыт, онно чэр суола да хаалара. Билигин 2 мм эрэ хайытыы оҥоһуллар, харахха дьайыыта олох кыра. Онон үрдүк хаачыстыбалаах эпэрээссийэ 15 мүнүүтэ эрэ оҥоһуллаар эрээри, бу бириэмэҕэ сиэстэрэлэр, аппараат үлэтин хааччыйар инженернэй сулууспа үлэһиттэрин, улахан бэлэмнэнии үлэтэ киирэ сылдьар, — диэн бэйэтэ хирурунан үлэлээбит Екатерина Кимовна кэпсээтэ.

Бу дьайыыны Арассыыйа Гиннеһин кинигэтин эспиэрдэрэ Юлия Пронина уонна Владимир Пронин кэтээн көрдүлэр.

— Арассыыйаҕа мэдиссиинэ эйгэтигэр рекордар оҥоһуллаллар, ол эрээри, улахан болҕомтону, кичэйэн кэтээн көрүүнү эрэйэллэр. Катарактаны суох оҥорууга рекорд Арассыыйаҕа аан бастаан оҥоһулунна. Хирурдар ымпыктаах-чымпыктаах үлэлэрин көрдүбүт. Хас биирдии хирург тугу, хайдах оҥорорун чуолкай билэриттэн, сатабыллааҕыттан сөхтүм. Кырдьаҕастар тута көрөр буолан, үөрэн-көтөн бардылар. Онон биирдэ да тардыллыы, эчэйии тахсыбата. Рекордары оҥорууга ыксалга араас буолааччы, — диэн Юлия Пронина суруналыыстарга кэпсээтэ.