Харах быраастара рекорд олохтоотулар

Бэлиэ түгэни Арассыыйа рекордун кинигэтин эспиэрдэрэ кэтээн көрдүлэр, бигэргэттилэр.
Пациеннар улуустартан, куораттартан икки-үс күн иннинэ эрдэ кэлэн, балыыһаҕа киирбиттэрэ. Быраастар кинилэр харахтарын туругун чинчийэн, ким эпэрээссийэлэниэн сөбүн быһаарбыттара, 117 киһини бэлэмнээбиттэрэ. Уустук соҕус туруктаахтары кэнникигэ хаалларбыттара.
Сүрүннээн сааһырбыт дьоҥҥо катаракта тахсан эрэйдиир, улам көрбөт буолан иһэллэр. Онон бу күн катаракталарын эпэрээссийэлээтилэр, болоорбут хрусталиктарын уларыттылар. Пациеннар саастара — 60-80. Эпэрээссийэ түргэнник оҥоһуллар, онон үгүстэрэ үчүгэйдик көрөр буолан, астынан, тута дьиэлэригэр таҕыстылар. Сорохтор иккис харахтарын кэлин эпэрээссийэлиэхтэрэ, онон балыыһаҕа хааллылар.
Барыта 9 хирург бу рекорду олохтооһуҥҥа кыттыбытыттан, хас биирдиилэрэ, ортотунан, 9-11 киһини эпэрээссийэлээтэ.
Өрөспүүбүлүкэ ыстааты таһынан кылаабынай офтальмолога, үрдүк технологиялаах мэдиссиинэ көмөтүн отделениетын сэбиэдиссэйэ Екатерина Захарова этэринэн, эпэрээссийэни оҥоруу технологията сыллата сайдан иһэр.
Аан дойдуга сылга 1 мөлүйүөн киһиэхэ 3 тыһыынча киһиэхэ катарактаҕа эпэрээссийэ оҥоһуллар буоллаҕына, бу социальнай кыһалҕа буолан бүтэр диэн этэллэр. Онон харах балыыһатын быраастара бу 3 тыһыынча эпэрээссийэни оҥорорго дьулуһар этилэр. Былырыын бу сыыппара икки төгүл кэриҥэ улаатан, 5 тыһыынчаттан тахса эпэрээссийэни оҥорбуттара. Быйыл өссө элбэх буолуоҕа.
Үбүлүөйү көрсө үлэни үйэтитии
Бу дьайыыны Арассыыйа Гиннеһин кинигэтин эспиэрдэрэ Юлия Пронина уонна Владимир Пронин анаан кэлэн кэтээн көрдүлэр.
— Арассыыйаҕа мэдиссиинэ эйгэтигэр рекордар оҥоһуллаллар, ол эрээри, улахан болҕомтону, кичэйэн кэтээн көрүүнү эрэйэллэр. Катарактаны суох оҥорууга рекорд Арассыыйаҕа аан бастаан оҥоһулунна. Хирурдар ымпыктаах-чымпыктаах, уустук үлэлэрин көрдүбүт. Хас биирдии хирург тугу, хайдах оҥорорун чуолкай билэриттэн, сатабыллааҕыттан сөхтүм. Кырдьаҕастар тута көрөр буолан, үөрэн-көтөн бардылар. Онон биирдэ да тардыллыы, эчэйии тахсыбата. Рекордары оҥорууга ыксалга араас буолааччы, — диэн Юлия Пронина кэпсээтэ.
Офтальмологическай балыыһа кылаабынай бырааһа Иван Луцкан этэринэн, урут да биир күн иһигэр элбэх киһини эпэрээссийэлии сылдьыбыттар эбит. Сороҕор күҥҥэ 160 киһини эпэрээссийэлээбиппит диир. Ол эрээри, көннөрү күҥҥэ 50-ча эпэрээссийэ оҥоһуллар.
— Бу маннык рекорду туруоруу үйэлээх үбүлүөйбүтүн көрсө биһиги балыыһабыт көҕүлээһинэ буолар. Кэлэктииппит дьон хараҕын быыһыырга, көрөрү тупсарарга үлэтэ түмсүүлээҕин, көдьүүстээҕин, быраастарбыт үрдүк сатабыллаахтарын, Саха сиригэр мэдиссиинэ тэтимнээхтик сайдан иһэрин көрдөрөр. Биһиги кими да кытта күрэстэһэр сыалбыт суох этэ, 100 сыллаах үбүлүөйбүтүн үйэтитэр, кыахпытын көрдөрөр соруктаахпыт. Онон харах балыыһатын иккис үйэтин арыйар саҥа илииһин арыйабыт.
Биһиги өрөспүүбүлүкэбитигэр катарактанан ыалдьыы көрдөрүүтэ үрдүк, тоҕо диэтэр, киһи үйэтэ уһаан иһэр, сааһырыы тэтиминэн уонна олох таһымын хаачыстыбатынан ыарыы элбиир. Биһиги сааһырбыт дьоммут ханна да атын эрэгийиэҥҥэ барбакка, олорор сирдэринэн көмөнү ылалларыгар кыһаллабыт. Быйыл 20 улууска сырыттыбыт. Быраастарбыт квалификацияларын үрдэтэллэригэр болҕомтобутун уурабыт. Эдэр хирург катарактаны эпэрээссийэлиир буолуор диэри 9 сыл ааһар. Онон катарактаны суох оҥорууга биһиги балыыһабыт Арассыыйаҕа инники күөҥҥэ сылдьар, — диэн кини эттэ.
“Улахан бэлэмнэнии үлэтэ барбыта”
Екатерина Захарова, өрөспүүбүлүкэ ыстааты таһынан кылаабынай офтальмолога, үрдүк технологиялаах мэдиссиинэ көмөтүн отделениетын сэбиэдиссэйэ:
— Урут биһиги катаракталаах дьону ситиэр диэри өр кэтэһиннэрэр этибит. Билигин катаракта ситэ да илигинэ, эрдэ оҥоһуллар буолла. Аны урут 10 мм диэри хайытарбыт, онно чэр суола да хаалара, астигматизм үөскүүрэ. Билигин 2 мм эрэ хайытыы оҥоһуллар, ол харахха дьайыыта олох кыра, күн сарсыныгар чөлгө түһэллэр, тута дьиэлэригэр тахсаллар.
Онон үрдүк хаачыстыбалаах эпэрээссийэ 15 мүнүүтэ эрэ оҥоһуллар эрээри, бу бириэмэҕэ сиэстэрэлэр, үрдүк технологиялаах тиэхиньикэ, аныгы микроскоп үлэтин хааччыйар инженернэй сулууспа үлэһиттэрин, улахан бэлэмнэнии үлэтэ киирэ сылдьар.
Сахабыт сирэ олус киэҥ, ыраах сытар, суола-ииһэ суох нэһилиэктэр элбэхтэр. Биһиги көмөбүт Саха сирин хас биирдии олохтооҕор тиийэригэр, ордук сааһырбыт дьон олохторун хаачыстыбата тупсарыгар кыһаллабыт.
1,3 саастаах оҕоҕо катарактатын эпэрээссийэлээн, суох оҥорон турабыт. Катаракталаах төрүүр оҕолор эмиэ бааллар. Оҕолорго эпэрээссийэ өссө уустук буолар. Сааһырбыт дьоҥҥо хрусталиктара өлбөөрөр, таарыйа ону уларытан биэрэбит.
100 сыллаах үбүлүөй күн аайы буолбат, онон бу бэлиэ түгэни ураты тэрээһининэн, күүстээх үлэнэн бэлиэтээтибит.
Иннокентий Белолюбскай, офтальмолог—быраас:
– Бүгүн мин катарактаҕа 9 эпэрээссийэни оҥордум. Биир эпэрээссийэҕэ, ортотунан, 15 мүнүүтэ барар. Урут оҥорор эпэрээссийэлэрбиттэн туох да уратыта суох этэ, арай, бүгүн кыра долгуйуу баара. Биһиги балыыһабыт аатын-суолун туһугар мэлдьи кыһаллабыт, маннык улахан тэрээһиҥҥэ кыттыбыппыттан үөрэбин, дьоллонобун.





Сообщить об опечатке
Текст, который будет отправлен нашим редакторам: