Харбалаах суола сабылынна

Бу күннэргэ дохсун ардах түһэн, Таатта улууһун Харбалаахтыыр суола алдьаммытын туһунан иһитиннэрбиппит. Саха сирин суоллара управление бирикээһинэн «Харбалаах» айан суола быстах кэмҥэ сабылынна.

Бу туһунан Саха сирин суоллара управление иһитиннэрэр.

Таатта улууһун «Харбалаах» айан суолун 18-н 24 км диэри учаастагар суол алдьанан тырааныспар бары көрүҥэр сырыы бобулунна. Билиҥҥи балаһыанньанан суол 6 км, 7 км уонна 13 км уу тахсара сабаҕаланар.

Бүгүҥҥү туругунан «Тааттаавтодор» ААУо айан сырыыта бобуллубутун туһунан суол бэлиэлэрин туруорда уонна суукканы эргиччи дьуһуурустуба олохтоото. Суол уу түспүтүн кэнниттэн чөлүгэр түһэриллиэ. Онуоха сөптөөх тиэхиньикэлэр суол тэрилтэтигэр бааллар диэн Саха сирин суоллара управлениеҕа бэлиэтээн эттилэр.