Харчылаах бакыаты булан ылбыт уонна…

Дьокуускайга улахан суумалаах харчыны сүтэрбит киһиэхэ көмөлөстүлэр. Биир киһи харчыны булан баран, полицейскайдарга  тыллаан, хаһаайынын буллулар.

Бу түбэлтэ ахсынньы 20 күнүгэр буолбута. Биир киһи Пушкин уулуссатынан хааман иһэн, хаарга 285 тыһыынча солкуобайдаах салаппаан бакыаты булан ылбыт. Бу харчыны бэйэтигэр ылан кэбиспэтэх, ол оннугар хаһаайынын көрдүү сатаабыт: чугастааҕы маҕаһыыннартан ыйыталаспыт, турар массыыналары кэрийбит. Көрдөөһүн туох да түмүгү биэрбэтэҕин иһин, эр киһи  Ис дьыала министиэристибэтин 2 №-дээх полиция управлениетын дьуһуурунай пуунугар эрийбит.

Полиция үлэһиттэрэ тута харчы хаһаайынын көрдөөн барбыттар. Бу булумньу туһунан информацияны интэриниэт ситимигэр таһаарбыттар. Сарсыныгар харчыны сүтэрбит киһи быраата бу биллэриини көрбүт. Кини түргэнник аймаҕын кытта сибээстэспит,  тута быраабы араҥаччылыыр уорганнарга эрийбит.

Полиция отделениетыгар барытын сиһилии бэрэбиэркэлээн баран, харчыны дьиҥнээх хаһаайыныгар төннөрбүттэр.

Сүтүктээх киһи кэпсээбитинэн: быраатын кытта кууркаларын атаспыттар уонна ис хармаана хайдыбытын өйдөөн  көрбөккө, онно харчы бакыатын укпут. Баран истэҕинэ, бакыата түспүт, ону кини сүппүтэ хас да чаас буолбутун  эрэ кэннэ билбит. Төннөн көрдүү сатаабыт эрээри, булбатах,  мунньуллубут харчытын хаһан эмэ көрүөм диэн эрэлин сүтэрбит.

Кини  үтүө санаалаах, чиэһинэй киһиэхэ уонна үчүгэйдик тэриллибит көрдөөһүн иһин полицияҕа  ис сүрэҕиттэн махталын биллэрдэ.

Оттон булбут киһиэхэ, Александр Гоголевка Арассыыйа Ис дьыалаҕа министиэристибэтин Дьокуускайдааҕы управлениетын начальнига, полиция полковнига Алибек Даутов эппиэтинэстээх уонна гражданскай эбэһээтэлистибэлээх буолуутун иһин тус бэйэтинэн махтанна, Махтал суругу уонна өйдөбүнньүк бэлэҕи туттарда. Бу туһунан ИДьМ пресс-сулууспата иһитиннэрэр.