Харчыны халаабыт оҕолор дьыалата суут көрүүтүгэр ыытылынна

Сокуоннай саастарын ситэ илик оҕолор буруйу оҥорууга уорбалааһыҥҥа холуобунай дьыала силиэстийэтэ түмүктэннэ. Бу туһунан Саха сиринээҕи Силиэстийэлиир кэмитиэтин пресс-сулууспата суруйар.

Силиэстийэ түмүгүнэн, 2024 сыл алтынньытыгар Дьокуускай куорат биир оскуолатыгар икки үөрэнээччи 2011 с.т. үс үөрэнээччиттэн 7 тыһ.солк. суума харчыны күүстэринэн күһэйэн туран көрдөөбүттэрэ быһаарылынна. Онуоха үрдүкү кылаас үөрэнээччилэрэ оҕолору сынньыбыттар, куттаабыттар. Түмүгэр оҕолор уорбаланааччы оҕолор ирдиир суума харчыларын хомуйан биэрбиттэр.

Тахсыбыт түбэлтэ туһунан биир уол оскуолаҕа барыан баҕарбат буолбутун уонна ийэтин кытта кэпсэппитин кэмигэр биллибит. Дьахтар икки атын эмсэҕэлээбит оҕолор төрөппүттэригэр эрийбит уонна кэлин үөрэх тэрилтэтин салалтатыгар тахсыбыт.

Маннык түбэлтэ атын үөрэх тэрилтэтигэр эмиэ тахсыбыта бэлиэтэммит. 15 саастаах оскуола үөрэнээччитэ оҕоттон 6 тыһыынча солк. суума харчыны биэрэргэ күһэйбит, ону таһынан доҕорун кырбыырынан куттаабыт. Бу түбэлтэ эмиэ төрөппүт оҕотун кытта кэпсэтиитин түмүгэр биллибит. Түбэлтэ биллибитин кэннэ буруйданааччы эппиэтинэстэн куотуна сатаабыт да, бары силиэстийэ буруйу оҥоһуллубута дакаастаммыт. Холуобунай дьыалалар суут көрүүтүгэр ыытылыннылар.