Харыйа – баҕа санаа ымыыта…

Саҥа сылы көрсө харыйаны туруоруу, дьиэни киэргэтии аҥаардас бырааһынньыкка эрэ бэлэмнэнии буолбатах. Фэн-шуй этэринэн, бу барыта үүнүөхтээх сылга бэйэҕэ үтүөнү, доруобуйаны, баайы-дуолу, тапталы, ситиһиини тардыы буолар.

Харыйа аптаах тыына

Өскөтүн, харыйа сөптөөх сиргэ турдаҕына, барыта эриэ-дэхси буолар, сыл устата дьиэ олохтоохторугар ситиһиини, дьолу, үөрүүнү түстүүр.

Ахсынньы аам-даам тымныыта аптаах салгынынан толору курдук. Тоҕо эрэ оҕолуун, улахан дьоннуун туох эрэ дьиктини, буолуохтааҕы уонна кэрэни күүтэллэр. Сорохтор харыйаны туруорбаттар. Кинилэр санааларыгар дьиэҕэ кыра оҕо суох буолла да, харыйа туруорар наадата суох курдук өйдүүллэр. Ити кинилэр харыйаны таах киэргэл эрэ курдук саныылларыттан тахсар. Ол эрээри, ис дьиҥэр киирдэххэ, харыйа дьиримнэс уота-күөһэ, астына-долгуйа лабаа ахсын ыйаабыт оонньуурдарыҥ бары баҕа санаа ымыытын толорор аналлаахтар. Саҥа сыл үүнэр аптаах түүнүгэр тугу санаабытыҥ туоларын умнума.

Тыыннаах харыйа ордук

Ахсынньы эниэргийэтэ харыйа ханан турбутунан, хайдах киэргэтиллибитинэн сөпкө тарҕанар. Фэн-шуй үөрэҕинэн, харыйа туруорарга хос эбэтэр саала эрэ иһинээҕи туһаайыылары көрбөккө, бүтүннүү дьиэҕин, кыбартыыраҕын көрөрүҥ наада. Дьиэҥ иһигэр илин, арҕаа ханан баарын үчүгэйдик удумаҕалаппат буоллаххына, куомпаһынан сирдэтинэр олус туһалаах. Дьиэҥ ортотугар туран сирдэтинэр наадатын фэн-шуй Кытай ускуустубатын астролога Наталия Гурьянова сүбэлиир. Кини этэринэн, харыйаны сыаллаах-соруктаах киэргэтии киһиэхэ эрэли, дьиктини, кэрэни күүтэр күүстээх санааны иҥэрэр, үөскэтэр эбит. Буоллун-хааллын, оҕолорго эрэ диэн соруктаах киэргэтии туһаны аҕалбат. Харыйаны киэргэтиигэ дьиэ кэргэн бары кыттыахтаах. Оттон фэн-шуй этэринэн, саамай туһалаах харыйа — тыыннаах харыйа буолар. Харыйа лабаалара ууга туран тыллан, көҕөрөн барар буоллахтарына, баҕа санаа барыта туолар эбит. Ол эрээри, тыыннаах харыйа үгүс дьоҥҥо кыаллыбат, онон искусственнай да харыйа уота-күөһэ, сөптөөхтүк талыллыбыт миэстэ уонна оонньуурдар үтүөнү түстүүр кыахтаахтар.

Ханан туруорабыт?

Илин — сырдык, кэрэ эниэргийэни үөскэтэр миэстэ. Күн тахсар сирин диэки харыйаны туруордахха, сыл устата чэгиэн, үгүс үөрүүлээх сылдьыаҥ дииллэр. Ол эрээри, харыйаҕар сүрүннээн от күөх, кыһыл, көмүс, мас өҥнөөх оонньуурдарынан киэргэтэриҥ наада. Чаҕылхай, сылаас өҥү биэрэр гирлянда харыйаҕын өссө тупсарыа. Ахсынньы саҥата дьиэҥ илин өттүгэр харыйа туруордаххына, үүнүү, сайдыы, саҥа тосхоллор буолуохтара диэн фэн-шуй үөрэхтээхтэрэ сүбэлииллэр.

Соҕуруулуу-илин — саамай сөптөөх быһаарыныы. Манна үп-харчы хотоҕостуу хамсыыр туһаайыыта буолар. От күөх, кыһыл, пурпурнай, мас уонна уот өҥнөөх оонньуурдар харчыны, баайы-дуолу тардыаҕа.

Соҕуруулуу-арҕаа — сымнаҕас эрээри биир күдьүс ситиһиини түстүүр. Дьиэ кэргэҥҥэ эйэлээх эйгэни, нус-хас олоҕу түстүүр миэстэ. Үрүҥ, үрүҥ көмүс, халлаан күөх, сырдык өҥнөөх оонньуурдар ордук барсаллар. Аһара күүстээх уоту-күөһү холбуур наадата суох.

Ханан туруорар көҥүллэммэтий?

Ардыгар сорохтор фэн-шуй биһиги итэҕэлбит буолбатах, онон ханан табыгастааҕынан туруорабыт диэн билиммэттэр. Ол эрээри, туохха да итэҕэйбэт, тугу да аахайбат буоллахха, олоххо эмиэ оннук барыта күөрэ-лаҥкы, күннээҕинэн субулларын, киһи доруобуйатыгар араас охсуулар, кэһиллиилэр буолалларын, үлэҕэ-хамнаска, тус сыһыаҥҥа эмиэ дьайарын эспиэрдэр бэлиэтииллэр. Онон бу миэстэҕэ туруорар табыгаһа суох, тоҕо?

Арҕаа, Хоту, Хотугулуу-Арҕаа

Өскөтүн, бу сиртэн атын сиргэ харыйа туруорар миэстэҥ суох буоллаҕына, биллэн турар, туруораҕын эрээри, киэргэтиигэ болҕомто уураргын умнума.

Үрүҥ, халлаан күөх, сырдык өҥнөөх оонньуурдары тала сатаа. Кыһыл оонньуурдары иилимэ. Аһара дьиримнэс уоту-күөһү холбоомо.

Соҕуруу уонна Хотугулуу-Илин

Чуумпу, киһи хараҕар быраҕыллыбат харыйа буолуохтаах. Кыһыл оонньуурдары иилимэ. Үрүҥ, сырдык оонньуурдар ордук барсаллар. Гирляндата да суох буоллаҕына, мэһэйдээбэт. Дьиэ иһинээҕи эниэргийэни кэспэт туһуттан, харыйа сэмэй буолуохтаах.

Ахсынньы айдааны, тыаһы-ууһу ылыммат

Ахсынньыга аһара тыастаах-уустаах киэргэтии наадата суох. Дьиэни киэргэтэр туһуттан истиэнэни үүттээн, быһан-отон барар үчүгэйи аҕалбат. Хотугулуу-илин, соҕуруу, илин, соҕуруулуу-илин уонна соҕуруулуу-арҕаа ордук маны тутуһаргыт наада. Харыйа туруорарга сөптөөх да миэстэ буоллаҕына, харыйаны чуумпутук, улахан тыаһа-ууһа суох киэргэтэр наада. Харыйа — Ци эниэргийэни күүһүрдэр, тоҕо диэтэххэ, кини уота-күөһэ, киэргэллэрэ сылы түстүүр аналлаахтар. Сөптөөх миэстэҕэ туруордаххытына, кэлэр ситиһиини күүһүрдэҕит уонна түргэтэтэҕит. Оттон сөбө суох сиргэ туруордаххытына, кыһалҕаны күүһүрдэн биэрэҕит. Онон фэн-шуй диэн итэҕэл эрэ буолбатах, дьиэ иһинээҕи эниэргийэни сөпкө тарҕатар уонна ону туһанар үлэ буолар.

Уот кыһыл ат сылыгар

Уот кыһыл ат сылыгар харыйаны талыы улахан суолталаах. Тыыннаах харыйа — айылҕаҕа саамай чугас, бу соторутааҕыта үүнэн силигилии турбут мас буолар. Мутукча сибиэһэй сыта абылыыр. Ол эрээри. Уот кыһыл ат сылыгар тыыннаах маһы сөбө суох секторга туруоруллубат. Фэн-шуйунан уот маһы уматар. Оттон үгэс быһыытынан наар тыыннаах харыйаны туруорар буоллаххытына, харыйаны дьиэ хоту эбэтэр илин өттүгэр туруоруҥ. Дьиэ ортотугар туруорартан туттунуҥ. Уот элэмиэнин аччатар туһуттан хараҥа, үрүҥ, күөх оонньуурдары иилиҥ. Бырааһынньык кэннэ тыыннаах харыйаны өр туруорумаҥ. Харыйа иннэтэ барыта түһэрин күүтүмэҥ. Ол эрээри, аны дьиктитэ, уот кыһыл ат сылыгар иһиттээх (горшок) буорга турар тыыннаах харыйа саамай сөптөөх диэн бэлиэтииллэр фэн-шуй эспиэрдэрэ. Үүнүүнү, сайдыыны түстүүр. Оттон буор — уот силигилии үүммүтү аһара сиэн кэбиспэтин туһугар биир тэҥник (балансы) тутар суолталаах. Харыйаҕын хайдах киэргэтэҕин да сылы оннук көрсөҕүн. Онон үүнэр 2026 сыл дьолу, үөрүүнү түстүүрүн туһугар харыйаны сөптөөх сиргэ туруоруҥ уонна үөрэ-көтө, баҕа санааҕытын ыралаан киэргэтэргитин умнумаҥ.