Харыйалаах табаһыттарыгар сэргэх күннэр

Табатынан аатырбыт Өлөөн улууһун Харыйалаах нэһилиэгин табаһыттара күннэри-түүннэри табаларын энчирэппэт туһугар кыһаналлар. Биһиэхэ бэс ыйын саҕаланыытыттан тугут төрөөн бүттэ даҕаны, табаһыттар көһүүлэрэ саҕаланар. Ол курдук, мастан туундараҕа тахсаллар. Быйыл бэс ыйын ортото хаар түһэн соһуталаабыта, ону ол диэбэккэ табаһыттар көһүүнү тохтоппотохторо.

Бу соторутааҕыта улахан эбэни Куонаапканы оҥочонон  туораан, туундараҕа этэҥҥэ тахсыбыттара.

Оттон бэҕэһээ икки ыстаадаҕа бөртөлүөт көппүтэ. Бүгүн Дьэлиҥдэҕэ үлэлиэҕэ. Сарсын Харыйалаахха бастакы уонна иккис нүөмэрдээх ыстаадаларга көтөрө күүтүллэр. Оччоҕо сорох табаһыттар дьиэлэригэр сынньана кэлиэхтэрэ.

Быйыл сайын табаларбыт этэҥҥэ сайылааталлар диэн баҕалаахтар табаһыттар.

Мария Полуэктова, Өлөөн.