Харыйалаахха эр дьон көхтөөхтүк кытынна

 Бэҕэһээ, олунньу 17 күнүгэр буолбут отчуокка, Харыйалаахха элбэх киһи сырытта. Үчүгэйэ диэн эдэрдэр хото кэлбиттэр, эр дьон олус көхтөөхтүк кытынна. Тоҕо?

Сэрэйдэххэ, манна эр дьон бары булчуттар. Онон булт боппуруостарын сытыытык туруордулар, ыйыталастылар. Онуоха СӨ Экологияҕа, айылҕаны туһаныыга, ойуур хаһаайыстыбатыгар миниистирин солбуйааччы Николай Додохов чуолкай хоруйу биэрдэ, сиһилии быһаарда. Кини булт быраабылата уларыйа турарын тоһоҕолоон бэлиэтээтэ.

«Саха сиригэр томороон тымныыга, ахсынньы-тохсунньу ыйдарга, бултуур ыараханын билэбит. Олунньу-кулун тутар ыйдарга көҥүллээҥ диэн боппуруоска үлэлэһэбит», — диэтэ. Мөккүөрдээх, быһаарыыны эрэйэр боппуруос элбэх. Онуоха туһааннаах министиэристибэ үлэлэһэр. Владимир Николаев, Алексей Сергеев, Мирослав Иванов, Анатолий Егоров уо.д.а. олус көхтөөхтүк кытыннылар.