Харысхал нэһилиэстибэтин үйэтитэр үлэ барыахтаах

Норуодунай суруйааччы Баһылай Харысхал төрөөбүтэ 75 сылыгар анаммыт төгүрүк остуол Национальнай бибилэтиэкэ Устуоруйа саалатыгар буолла.

Сааланы тобус-толору киһи мустубута Василий Егорович Васильев-Баһылай Харысхал айар үлэтин сэҥээрээччи, сүгүрүйээччи элбэҕин туоһулуур. Истиҥ, дириҥ ис хоһоонноох кэпсэтии буолла.
Наталья Харлампьева, Саха сирин Суруйааччыларын сойууһун бэрэссэдээтэлэ:
— Василий Егорович тас дойдуларга тахсан, айан бөҕөтүн айаннаан, туруорсуу бөҕөтүн туруорсан, киниэхэ архыыптар сабыылаах ааннара аһылларын сөҕөр этим. Дьокутаат буола сылдьан, саха дьонугар куруук ахтыллар бэлиэ түгэннэригэр, Конституция, тыл сокуонун, о.д.а. ылылларыгар көхтөөх кыттыыны ылбыта.
Бүгүн Харысхал норуотун иннигэр оҥорбут үтүөтүн ахтан эрэ ааспакка, кини аатын, үлэлэрин үйэтитиини торумнуохпут дии саныыбын.
Афанасий Владимиров, Ил Түмэн дьокутаата:
— Амма улууһун дьаһалтата Харысхал сылыгар анаммыт дэкээдэни көҕүлээбитэ олус үчүгэй. »Ааспыт кэм аартыктарынан» кинигэтинэн биэс улууска научнай-практическай кэмпириэнсийэни ыыппыппыт. Бу кинигэҕэ үгүс дьон кыайан тиксибэккэ хаалбыттара. Онон хос таһаарарга көрдөспүттэрэ. Ол ону болҕомтоҕо ылыахпытын наада. Василий Егорович айымньыларын нөҥүө үйэлээх сыаннастар, норуот чулуу дьонун, саха дьылҕатын туһунан суруйар. Мин кинини кытта доҕордоспуппунан киэн туттабын. Арыт мөккүһэн да ыларбыт, бииргэ үлэлэһэрбит.
Мария Турантаева, култуура миниистирин солбуйааччы:
— Кинини кытта бииргэ үлэлээбит дьоллоохпун. Саха тыйаатырыгар туруоруллубут кини испэктээкиллэрэ туспа ис хоһоонноохтор, ол эрээри биир ситимнээхтэр. Сэтинньи ыйга Харысхал испэктээкиллэрэ буола тураллар. Кини драматург быһыытынан, худсэбиэккэ кэлэн, бэйэтин санаатын этэн, туруорсан тэйэрэ. »Көмүөл», »Эргиллиэм хайаан да», »Учуутал» испэктээкиллэригэр билиэт эрдэттэн бүтэн хаалар. Кини айымньылара Саха тыйаатырын »көмүс пуондатыгар» киирбиттэрэ. Кини барыытынан, саха драматургията улахан сүтүктэммитэ. Кини айымньылара сыллар аастахтарын ахсын, суолталара өссө дириҥээн иһиэхтэрэ.
Афанасий Мигалкин Ил Түмэҥҥэ бииргэ хайдах үлэлээбиттэрин туһунан кэпсээтэ.
Елена Голомарева, норуот дьокутаата:
— Василий Егорович аҕыйах ахсааннаах норуоттар устуоруйаларыгар сыһыаннаах айымньыны суруйбута. Ол сценарийын бастаан миэхэ аахтарбыта. Хотугу норуоттар олохторун олус таба ойуулаабыт этэ. Бастаан киинэтэ тахсыбыта. Хайдах эрэ наһаа түргэнник быһаарыллан, дьон өрө көтөҕүллэн, табыллан хаалбыта. Суруйааччы оҥорбута үйэлээх, тоҕо диэтэр, кини ырааҕы, дириҥ суолтатын өтө көрөр. Драматын нөҥүө норуот туһугар үлэлээҥ, ыраас буолуҥ диэн этэр.
Үөлээннээҕэ, доҕоро, суруйааччы Дмитрий Наумов Баһылай оҕо, эдэр сааһын туһунан истиҥник кэпсээтэ. »Бэйэтин кэмин дьонуттан, биһигиттэн, уратытык көстөр дьоҕурдааҕа. Ханнык баҕарар киһини кытта биир тылы булар, кэпсэтэр уратылааҕа. Баһылай аҕатын курдук сүрдээх сытыы, кыанар уол этэ», — диэн элбэҕи кэпсээтэ.
Анатолий Николаев, СӨ үтүөлээх артыыһа:
— 1975 сылтан билсэн, убай-быраат курдук этибит. Баһылай Харысхал сахаларга букатын кэлбит киһи. Оҥорбута элбэҕэ бэрт. Ол сүүрбүтэ-көппүтэ, оҥорбута сыллар аастахтарын ахсын, суолтата дириҥээн иһиэҕэ. Кини оҕолорго кэпсээннэрин хос бэчээттээн таһаарар киһи, бэрт да буолуо этэ. Кини архыыба — биир самосвал массыына этэ. Ол хараллан сытар. Соторутааҕыта Харысхал пуондата тэрилиннэ. Онон кини архыыбын сыа-сым курдук тутан, үйэтитэргэ үлэ барыахтаах. Кини 15 пьесаны суруйбутуттан 9 пьесата Саха тыйаатырыгар турбута. Күүстээх санаалаах, дириҥ толкуйдаах, киэҥ далааһыннаах, сүрдээх тэрээһиннээх киһи этэ, — диэн кэпсээтэ. Аан бастаан тас дойдуларга тахсарыгар »Манньыаттаах» ырыынагы тэрийээччилэр көмөлөспүттэрин туһунан эттэ. Ол түмүгэр Манньыаттаах уолун, атын да умнуллубут, чулуу дьоммут туһунан айымньылары суруйан, сырдык ааттарын норуокка төнүннэрбитэ.
Бу курдук элбэх киһи тыл эттэ, олус истиҥник ахтан-санаан аастылар.