Хаартыскалар Т.А. Васильева тус архыыбыттан.
Соторутааҕыта өрөспүүбүлүкэ үтүө-мааны үлэһит дьонугар «Үлэ киһитэ» аат иҥэриллибитэ. Үрдүк ааты ылбыт 50 киһи ортотугар Мэҥэ Хаҥалас улууһун социальнай үлэһитэ Туйаара Афанасьевна Васильева баар.
Туйаара Васильева – Мэҥэ Хаҥалас улууһун Павловскай нэһилиэгин олохтооҕо, социальнай үлэһит.
Кини 1988 сыллаахха Бүлүү улууһун Бороҕон орто оскуолатын, 1992 сыллаахха Дьокуускайга тыа хаһаайыстыбатын тиэхиньикумун бүтэрэн, агроном идэтин, онтон 2006 сыллаахха Челябинскайдааҕы юридическай тиэхиньикум салаатыгар «Социальнай боппуруостарга юрист» идэни ылбыта.
Үлэтин 1990 сылтан «Аллараа Бүлүүтээҕи» сопхуос оробуочайынан саҕалаабыта. 1992-2001 сылларга В.И.Ленин аатынан агрофирмаҕа оҕуруот аһыгар биригээдэтин биригэдьиирин көмөлөһөөччүтүнэн үлэлээбитэ. 2001 сыл ыам ыйыттан Мэҥэ Хаҥалас улууһун УСЗН Павловскай сэлиэнньэтин социальнай үлэһитэ.
Туйаара Афанасьевнаны дьоно-сэргэтэ олус ытыктыыр. 2011 сылтан «Даамба» түөлбэни салайар. Түөлбэ начаалынньыгын быһыытынан үлэтэ сыл аайы сыаналанар. Сэттэ сылы быһа сыл аайы нэһилиэгэр уу аннынан балыктааһыҥҥа күрэхтэһиини ыыталлар. Манна түөлбэлэр олохтоохторо бары көхтөөхтүк кытталлар. Бу күрэхтэһиилэри ордук кырачааннар, оскуола оҕолоро уонна саастаах дьон сэргииллэр, махталларын этэллэр. Маннык тэрээһиннэр оҕону кыра эрдэҕиттэн айылҕаҕа, булка-алка, саха ыалын үгэстэригэр иитэргэ көдьүүстээх.
Биһиги дьоруойбут өссө 2011 сылтан ыла – төрөппүт кэмитиэтин бэрэссэдээтэлэ. «Даамба» түөлбэни салайар кэмигэр элбэх куонкурустарга, күрэхтэһиилэргэ бастаабыттара. Ол да иһин, Туйаара Афанасьевна хаста да «Түөлбэ бастыҥ салайааччыта» ааты ылбыта. Кини өссө социальнай үлэһиттэр өрөспүүбүлүкэтээҕи куонкурустарыгар «Бастыҥ уопсастыбанньык» уонна «Көрөөччүлэр биһирэбил бириистэрэ» номинациялар кыайыылаахтарынан тахсыбыта. Социальнай үлэһиттэр улуустааҕы куонкурустарыгар куруук кыттан, 1 уонна 2 миэстэлэри ылбыта. Мэҥэ Хаҥалас уонна илин эҥээр улуустар социальнай үлэһиттэрин ыһыахтарыгар бириистээх миэстэлэр хаһаайкалара.
Туйаара Васильева кырдьаҕас дьону кытары үлэҕэ хомуһунан терапияны туһанарга айар үлэ ааптарынан буолар. Кинини толоругас, үтүө суобастаах, эппиэтинэстээх үлэһит быһыытынан сыаналыыллар.
22 сыл устата кырдьаҕас дьону кытары үлэлииригэр кинилэргэ бэйэ киһитин курдук буолла, кинилэр баҕаларын үтүө суобастаахтык толорор. Ардыгар тус бэйэтин, дьиэ кэргэнин бириэмэтин да сиэртибэлиирэ баар суол.
Кини хаһан да үҥсэргиир, кырдьаҕастарыттан хомойор-хоргутар диэни билбэт. Биллэн турар, кинилэр ортолоругар ыарахан майгылаах, сотору-сотору ыалдьар дьон бааллар. Ол гынан баран, уопуттаах үлэһит Туйаара Афанасьевна хайаларын да кытары мөккүөргэ киирбэт, биир тэҥ сыһыаннаах, бары да өйдөһөллөр-өйөһөллөр.
Нэһилиэк олохтоохторо кини үлэтиттэн астыналлар, эбээһинэһин үтүө суобастаахтык толорорун сыаналыыллар. Туйаара Афанасьевна көмөҕө наадыйар дьоҥҥо хаһан баҕарар аттыларыгар баар буола түһэр. Онуоха кини социальнай үлэһит эрэ буолбакка, аһымал санаа сиэстэрэтин курдук буолар үтүө хаачыстыбалаах.
Туяра Афанасьевна идэтин куруук үрдэтинэ сылдьар, сыл аайы аттестацияны туттарар, ханнык баҕарар уустук соругу хаачыстыбалаахтык толорор. Уопуттаах үлэһит быһыытынан, саҥа саҕалыыр социальнай үлэһиттэргэ үтүө сүбэһит буолар.
Кини «Оҕолорго үөрүүнү бэлэхтээ» социальнай бырайыак ааптара уонна салайааччыта. Бу бырайыактарын чэрчитинэн инбэлиит оҕолоох дьиэ кэргэттэргэ көмөлөһөллөр, успуонсардары, попечитэллэри көрдүүргэ араас технологиялары олоххо киллэрэллэр. Нэһилиэккэ 2012 сылтан үлэлээбит бырайыакка кыттыан баҕалаахтар элбээтэр элбээн иһэллэрэ үөрдэр. 4-с сылын кинилэргэ меценааттыыр.
Туяра Афанасьевна уус-уран самодеятельность солбуллубат кыттааччыта, «Төрүт» фольклор ансаамбылын чилиэнэ. Олус үчүгэйдик туойар хомустуур, ыллыыр.
«Үлэ киһитэ» үрдүк ааты ылбыт Туйаара Васильева – 4 оҕо тапталлаах ийэтэ. Оҕолорун кыра эрдэхтэриттэн үлэҕэ, дьулуурдаах буоларга, кырдьаҕастары ытыктыырга үөрэтэр, иитэр.
Иллэҥ кэмигэр иистэнэр, баайар, оҕуруот аһын, сибэккилэри олордор. Кини иилээн-саҕалаан туттарбыт оҕо былаһаакката волейболлуур уонна футболлуур сирдээх.
Туйаара Афанасьевна орто дойду олоҕор «Биир да күнү үтүө дьыалата суох атаарымыахха!» диэн тускулу тутуһар.
Балаҕан ыйын 12 күнүгэр ИДьМ Жатайдааҕы полициятын дьуһуурунай чааһыгар, Жатай бөһ. Севернай уулуссаҕа эдэр ыччаттар…
«Воин» киин өрөспүүбүлүкэҕэ ыытыллар Бүтүн Арассыыйатааҕы байыаннай-тактическай «Путь Воина» күрэхтэһиитин түмүктүүр түһүмэҕин ыытыы бэлэмин бэрэбиэркэлээтилэр.…
Балаҕан ыйын 13 күнүгэр Үөһээ Бүлүү улууһун Н.А. Золотарев аатынан Боотулуу орто оскуолатыгар сылын ахсын…
Дьокуускай куоракка анал дьупулуомнаах уонча остеопат-быраас баарыттан биирдэстэринэн травматолог-быраас, ортопед, остеопат уонна мануальнай терапевт Иван…
Бүгүн быыбардыыр учаастактарга элбэх ыччат кэлэн гражданскай иэстэрин толордулар. Бу хаартыскаларга өрөспүүбүлүкэбит араас улуустарыгар быыбардыыр…
Быыбар учаастактарыгар бэрээдэги араҥаччылыыр уорганнар үлэһиттэрэ бэрээдэги кэтииллэр. Ону таһынан уопсастыбаннай кэтээн көрөөччүлэр быыбар хаамыытын…