Хас да киһи эчэйиилээх суол быһылаана таҕыста

Госавтоиниспиэксийэ иһитиннэрбитинэн, олунньу 7 күнэ үүнэр түүнүгэр  04:44 ч. Ис дьыала министиэристибэтин Мииринэйдээҕи отделын дьуһуурунай чааһыгар, «Анаабыр» суол 13 км  хас да киһи эчэйиилээх суол быһылаана тахсыбытын туһунан төлөпүөнүнэн эрийэн биллэрбиттэр.

Барыллааһын быһыытынан 36 саастаах  «TOYOTA COROLLA FIELDER» суоппара Ленскэй диэкиттэн   Мииринэй куорат Вилюйскай уулуссатынан  айаннаан иһэн,  уруулун кыайан туппакка, суолтан тахсан муоста кытыытын алдьаппыт. Ол түмүгэр суоппар уонна икки пассажир араас эчэйиини ыланнар,  Мииринэйдээҕи балыыһаҕа илдьиллибиттэр.

TOYOTA COROLLA FIELDER суоппара массыынаны ыытар 12 ыстаастаах эбит. Суол быһылаанын кэмигэр арыгы иһэн баран уруулга олорбута быһаарыллыбыт.