Хас да киһилээх оҥочо түҥнэстибит

Өлүөхүмэ улууһугар оҥочо түҥнэстэн үс киһини көрдүүллэр диэн улуус баһылыга  Николай Харбин СИА-ҕа  иһитиннэрбит. Суудуна балаҕан ыйын 19 күнүгэр  23 чаас саҕана түҥнэстибит.

«Барыллааһын чахчыларынан, суудуна мотуора умуллан, долгуҥҥа оҕустаран оҥочо түҥнэстибит. Эр дьон кытыл диэки харбаан барбыттар да, биир эрэ киһи кытылга тиийбит. Үс киһи  сүппүт. Билигин  ГИМС үлэһиттэрэ, тырааныспар полицията, учаскуобай үлэлииллэр», — диэн СИА-ҕа  Николай Харбин иһитиннэрдэ.

Биир сүппүт киһи Токко, икки киһи Куду Күөл олохтоохторо. Оҥочо Токкоттон  30 км сиргэ түҥнэстибит.