Хатаһынан өрүһү туоруур кыһыҥҥы суол хаһан аһыллыаҕай?

Быйыл халлаан урукку сыллардааҕар лаппа сылаас буолан, Өлүөнэ өрүһүнэн кыһыҥҥы суол аһыллыыта бытаарар  чинчилээх. «СӨ Массыына суоллара» управление иһитиннэрбитинэн,   тааҥнаан  уонна сылаас күн-дьыл туран, кыһыҥҥы суолу оҥорууга харгыстар үөскээбиттэр.

Билигин күннэтэ кыһыҥҥы суолу оҥорууга Дьокуускайга Хатас өттүттэн уонна Мэҥэ Хаҥалас улууһун өттүттэн икки бэдэрээтчит тэрилтэ  —  «Мехдорстрой»  уонна  «МКАД» ХЭУо үлэлииллэр.

Өрүс уҥа кытылыттан Уос-Кумахха диэри киирии суол  оҥоһуллан бүппүт.  Дьокуускай өттүттэн «Мехдорстрой» ХЭУо   өрүс суолугар киириигэ 4,2 км учаастак оҥорбут.

Билигин тааҥнаан балаһалары ыраастааһын үлэтэ тохтообут.