Хатас уран тарбахтаах Далбар Хотунун быыстапката турда

Араҥаччылыыр аналлаах силиһэ-мутуга дириҥээбит, чэчирии үүнэр Ийэ Хатыҥы санатар Надежда Игоревна дьылҕатыгар биир олус суолталаах көрсүһүү айарга-тутарга, оҥорорго, ситэрэргэ-хоторорго айыылартан аналлаах хараҕа куруутун уоттаах, илиитэ мэлдьи тугу эрэ гына сылдьар Константинова Вилена Михайловнаны кытта көрсүһүүтэ буолар. Дьэ, били балыксыт балыксыты ыраахтан билэр диэн көстүү буолбута. Кинилэр биир сүрүн майгыннаһар өрүттэрэ санаатым – оҥордум, иннибэр сыалбын көрөбүн, онно тиийэргэ туох да мэһэйи көрбөппүн диэн өйдөбүл буолар.

Бу үөһээ этиллибиккэ сүүс бырыһыан сөп түбэһэр майгылаах, туттуулаах-хаптыылаах, саҕалаабыты салгыыр, оҥорбуту түмүктүүр идэлээх буоланнар кинилэргэ итэҕэйэн, кинилэр умсугууйаларыгар сөп түбэһэн киирбит далбардар күннэри-түүннэри түбүктээх үлэлэрэ саҕаланнаҕа ол. Чопчу туруоруллубут сыал-сорук баар буолан, үөрэ-үөрэ үмүөрүһэн, астына-астына алтыһан, сэргии-кэрэхсии сэргэстэһэн тааарыйбыттара талба, оҥорбуттара оһуор-мандар ойуулаах, тикпиттэрэ дьикти кэрэ талааннаах-дьоҕурдаах дьоммут түмсэ түһэн тоҕуоруһан, муста түһэн кыттыһан оҥорон таһаарбыт көрүөхтэн кэрэ  үлэлэрин сөҕө-махтайа көрөр үлэлэр тахсаннар бэрт кылгас кэм иһигэр өрөспүүбүлүкэ таһымыгар буолар улахан тэрээһиннэргэ барытыгар кыттыһаллар.

Киһи аймах устуоруйатыгар саха норуота ирбэт тоҥноох, тыйыс айылҕалаах дойдуга сылгыны иитии култууратын сайыннарбыт тугунан да кэмнэммэт сүдү үтүөлээх омук диэн билинэллэр. Саха итэҕэлигэр Дьөһөгөй Айыы, Күн Дьөһөгөй, Уордаах Дьөһөгөй, Күрүө Дьөһөгөй диэн ааттарынан биллэр үһүс халлааҥҥа олорор Айыы икки атахтаах, босхо бастаах бороҥ урааҥхайга Үөһээ дойдуттан сылгыны түһэрбитэ үһү. Онтон ыла сылгы саха киһитин үҥэр таҥарата, миинэр миҥэтэ, көлүнэр көлөтө, аһа-таҥаһа буолбут диэн үһүйээҥҥэ кэпсэнэр. Оннук да буолан күҥ бүгүҥҥэ диэри саха норуота Дьөһөгөй оҕотугар ураты харыстабыллаах сыһыана, иһирэх майгыта өбүгэттэн бэриллэн кэлбитин итэҕэйэ саныыгын. Бу өйдөбүлгэ сыһыаран кэпсиир буоллахха Надежда сыккыс уутунуу  тохтообокко суккуллан, ситии быатыныы ситимнэһэн дьөһөгөйгө кылга-сиэлгэ,  тириигэ  тиэрдибит айар-тутар суола саҥаттан саҥа саҕахтары арыйар.

Быыстапка арыллыытыгар элбэх киһи кэлэн эҕэрдэ, алгыс тылларын анаатылар.  Бары ордук үөрбүт түгэммит бу быыстапканы “Симэх” норуот айымньытын киинин салайааччыта ытыктабыллаах Игнатьева Яна Викторовна ырытан-сыаналаан эппит эҕэрдэ тылыттан буолла. Кини этэринэн, Надежда Игорьевна ситэри-хотору сиппит-хоппут, тус бэйэ хайысхатын туппут, дириҥ билиилээх, сатабыллаах маастар буола  үүммүт. Дьэ астык сыанабыл буолла!

Түмүкпэр  киһи күүһэ туохханый… Тоҕо Надежда Игоревна бу хас эмит уонунан сыллар тухары уостубат тапталлааҕый, куруутун тардыһар үрдэллэрдээҕий диэҥҥэ киһи киһи быһыытынан күүһэ санаатыгар, ол күүс мунньуллан-мунньуллан таска тахсыытыгар уох – ис күүс, эньиэргийэ эбиллэн күүстээх-уохтаах – ис-тас туруктуун биир таһымҥа тахсан кыайыылаах-хотуулаах, ситиһиилээх суолу тэлэр эбит диэн санааҕа кэллим. Онно эбии эттэххэ, эбээтиттэн иҥмит  дириҥ силистээх-мутуктаах, аныгы олох олуурдаах отуорун, дууһа-сүрэх мөккүөрүн туруулаһан туран айар-тутар, түөс толору тыынан толору олоҕу олорор саха далбара буолара эмиэ кырата суох оруолу оонньуур. Кини биир күүстээх өрүтэ  үлэлээбит үлэтин үйэтитии буолар, ол аата дириҥээһин, кэҥээһин, тэнийии, өй-санаа өттүнэн байыы-тайыы.

Быыстапка Хатастааҕы “Тускул” КК, “Ситим” айымньы дьиэтин бииргэ үлэлээһиннэрин чэрчитинэн ыытылынна уонна   Арассыыйаҕа түмсүүлээх, сомоҕолоһуулаах буолуу, Сахабыт сиригэр Култуура уонна Дьокуускай куорат үөрэҕирии тэрилтэлэригэр Киин куоракка үөрэҕирии 100 сылыгар (Столичное образование)  ананна. Быыстапка “Симэх” норуот айымньытын киинин Арт-салонугар турда.

Наталья Руфова

Хатас – Дьокуускай, олунньу