“Хатас — Павловскай” өрүс суолун ахсынньы саҥатыгар аһар былааннаахтар

Тырааныспар уонна суол хаһаайыстыбатын миниистирэ Владимир Сивцев Хатас – Павловскай туһаайыытынан Өлүөнэ өрүһү туоруур суолу оҥоруу үлэтин баран бэрэбиэркэлээтэ. Бэдэрээтчиттэр «Мехдорстрой» ХЭУо уонна «СУ-77» ХЭУо үлэ билиҥҥи хаамыытын билиһиннэрдилэр. Ити туһунан биэдэмистибэ пресс-сулууспата иһитиннэрэр.

Павловскай сэлиэнньэ өттүттэн туорааһыҥҥа киирии уонна ыйааһын хонтуруолунан былаһаакканы оҥоруу үлэтэ бүппүт. Үөс Кумах арыыга бэрэбиэркэлиир үлэни (трассировка) ыыппыттар, билиҥҥитэ солуур уонна көпсөркөй кумаҕы уунан ыстарар үлэ барар.

Хатас сэлиэнньэтин өттүттэн туорааһын учаастага ордук уустук, өрүскэ үөс баар миэстэтэ буолар. Күһүнүн уһуннук сылыйан уонна өрүс туруутун болдьоҕо уһаан, тустаах учаастагы оҥоруу үлэтэ биллэ уустугурбут – бүгүҥҥү күҥҥэ муус чараас буолан, суол тиэхиньикэтэ туһаныллыбат. Күн бүгүн эбийиэккэ 17 киһи үлэлиир.

Миэстэтигэр баран көрүү уонна чинчийии көрдөрбүтүнэн, хамыыһыйа Хатас – Павловскай учаастагынан өрүс суолун ахсынньы бастакы дэкээдэтигэр аһыллар кыахтааҕын быһаарбыт.

Ити туһунан Ил Дархан уонна Бырабыыталыстыба пресс-сулууспата иһитиннэрэр.