Хатас – Павловскай хайысханан кыһыҥҥы суолга сырыы 10 туоннаҕа диэри үрдэтилиннэ

Бэнидиэнньиккэ, ахсынньы 8 күнүгэр, Хатас – Павловскай хайысханан Өлүөнэ өрүһү туоруур кыһыҥҥы суолга тырааныспарга көҥүл 10 туоннаҕа диэри үрдэтилиннэ.

«Хамыыһыйа тахсан үлэлээбитин түмүгүнэн, Хатас – Павловскай хайысханан Өлүөнэ өрүһү туоруур кыһыҥҥы суолга тырааныспар сырыытын 10 туоннаҕа диэри үрдэтэр туһунан быһаарыы ылылынна. Маршрут куттала суох буолуутун хааччыйар инниттэн “Саха сирин суоллара” тэрилтэнэн видеокэтиир тиһигэ тэрилиннэ уонна ыйааһыны хонтуруоллуур суукканы быһа үлэлиир пууннар туруорулуннулар», — диэн Тырааныспар министиэристибэтин иһитиннэриитигэр этиллэр.

Суоппардартан көҥүллэммит ыйааһыны аһарбаттарыгар уонна суол бэлиэлэрин ирдэбиллэрин кытаанахтык тутуһалларыгар көрдөһөллөр. Тырааныспардар икки ардыларыгар тэйиччитэ 70 миэтэрэттэн итэҕэһэ суох буолуохтаах.