Хатаска мас-рестлиҥҥэ Дьокуускай куорат чөмпүйүөннэрэ быһаарылыннылар

Хатас сэлиэнньэтигэр мас-рестлиҥҥэ «Көмүс мас» Дьокуускай куорат аһаҕас чөмпүйэнээтэ түмүктэннэ. Онно 23 хамаандаттан 160-тан тахса күрэсчит кытынна.

Түһүлгэҕэ уопуттаах мадьынылар иннилэригэр холонон көрбүт элбэх эдэр күрэсчит кытынна. Күрэхтэһиигэ Дьокуускайтан эрэ буолбакка, өрөспүүбүлүкэ атын улуустарыттан эмиэ мадьынылар кэллилэр. Ону таһынан, Ямал-Ненец автономнай уокуругуттан биир күрэсчит кыттыыны ылла. 70 киилэҕэ диэри ыйааһыҥҥа ордук тыҥааһыннаах киирсии буолла, манна ааттаах-суоллаах мадьынылар кытыннылар.

Полуфиналга интэриэһинэй хапсыһыы таҕыста: Европа чөмпүйүөнэ, Уус Алдан улууһун тустууга Семен Заболоцкай уонна аан дойду чөмпүйэнээтин призера, Сунтаартан сылдьар Герман Игнатьев көрсүстүлэр. Утарсааччылар күүстэринэн уонна маастарыстыбаларынан тэҥ кэриэтэ этилэр. Ол эрээри, 2:1 ахсаанынан Игнатьев кыайыыны ситистэ.

Финалга Сунтаар мадьыныта Саха сирин муҥутуур кыайыылааҕа Василий Чемпини кытта кииристэ. Бу хапсыһыыга 2:0 ахсаанынан Чемпин кыайыылааҕынан таҕыста. Дьахталлар ортолоругар 50 киилэҕэ диэри ыйааһыҥҥа ордук элбэх кыттааччы муһунна. Кыайыылааҕынан Дьокуускайдааҕы педагогическай кэллиэстэн Айаана Константинова буолла, кини Уус Алдан улууһун тустуугун Рада Домотованы кыайда. Оттон 55 киилэҕэ диэри ыйааһыҥҥа Хаҥалас улууһуттан Наталья Радченко бастыҥынан ааттанна. Кини финалга тахсар иһин киирсиигэ бэтэрээннэр ортолоругар аан дойду чөмпүйүөнэ Татьяна Дьячковскаяны, оттон кыһыл көмүс мэтээл иһин Чурапчыттан Наталья Федорованы кыайталаата.

Дьахталларга 75 киилэттэн үөһээ ыйааһыҥҥа Нам улууһуттан Вера Чичигинарова ордук үчүгэй тиэхиньикэни көрдөрдө. Кини бэйэтинээҕэр ыарахан ыйааһыннаах утарсааччыларын кыайда. Эр дьоҥҥо 90 уонна 105 киилэҕэ диэри ыйааһыннарга аан дойду чөмпүйүөннэрэ Уус Алдантан Егор Атласов уонна Амматан Егор Баишев кыһыл көмүс мэтээллэри ыллылар. Бастакыларыттан, Атласовка, финалга Ямал-Ненец автономнай уокуругуттан сылдьар, ХИФУ аатыттан кыттыбыт Меретя Яптик утарсааччынан буолла. Оттон Баишев ааспыт сыллааҕы Саха сирин чөмпүйэнээтин үрүҥ көмүс призерун, Уус Алдантан сылдьар Дмитрий Макеевы кыайда.

Бэлиэтээн эттэххэ, күрэхтэһии үгүс күрэсчиккэ олунньу 14-15 күннэригэр киин куоракка ыытыллар Саха сирин чөмпүйэнээтин иннинэ бэлэмнэнии сүрүн түһүмэҕинэн буолла.