Хатастааҕы «Ситим» норуот айымньытын дьиэтэ олохтоохтор көмөлөрүнэн саҥардыллыаҕа

Кэлиҥҥи сылларга СӨ үрдүкү салалтата олохтоохтор көҕүлээһиннэрин өйүүр бырагыраама (ППМИ) тэриллиэҕиттэн Сахабыт сирин бары улуустарыгар араас хайысханан үгүс элбэх үп-харчы көрүллэн, олох хаачыстыбата тупсуутугар төһүү күүс буолар.

Саргылана Стручкова салайааччылаах Дьокуускай куорат Хатастааҕы “Ситим”норуот айымньытын дьиэтэ хара тэриллиэҕиттэн үүнэр көлүөнэ ыччаты олоххо бэлэмнээн саха норуота үйэлэри уҥуордаан кэлбит сатабылларыгар уһуйан иис-күүс, мастан, тимиртэн оҥоһуктар эйгэлэригэр киллэрэр. Бу хайысхаҕа норуоттар икки ардыларынааҕы, Арассыыйатааҕы, өрөспүүбүкэ таһымыгар тиийэ үгүс элбэх ситиһиилэрдээхтэр, кыайыылардаахтар. Ханнык баҕарар үлэҕэ, үөрэххэ бастатан туран үлэлииргэ, үөрэнэргэ усулуобуйа баар буолуута ситиһиилээх, кыайыылаах буолуу тирэх буолара чуолкай.

“Ситимнэр” итини өйдөөн, ырытан, сааһылаан баран, олохтоохтор көҕүлээһиннэрин өйүүр бырагыраама чэрчитинэн үлэлэһэн нэһилиэнньэни кытта көрсүһүү оҥорон бу көҕүлээһиҥҥэ кыттарга санааларын этэн биһирэбили ыллылар. Барыахтаах үлэ барыта санаа курдук табылыннаҕына “Ситим” норуот айымньытын дьиэтэ тас өттүттэн бүрүллэн тас көстүү даҕаны, бэриллэр ичигэһи харыстааһын да өттүттэн (дьиэ сылаас буолуутун хааччыйыы) биллэ тупсуохтаах.

Бырагыраама ирдэбилин бары өттүттэн көрөн, бары пуунугар сөп түбэһэрдии докумуон хомуллан нэһилиэнньэ куоластааһыныгар күүскэ ылыстылар. Норуот күүһэ-көмүөл күүһэ диэн манна көстөр.

Наталья Руфова, Хатас