Хатастар Бырабыыталыстыба отчуотун биһирээтилэр

Кулун тутар 4 күнүгэр Хатас нэһилиэгэр СӨ Бырабыыталыстыбатын бэрэссэдээтэлин бастакы солбуйааччы Дьулустаан Борисов салайааччылаах ситэриилээх былаас отчуота буолан ааста.

«Владимир Путин көҕүлээбит национальнай бырайыактары олоххо киллэриигэ 2023 сылга диэри 70 млрд солк. көрүллүбүтэ, ол иһигэр федеральнай бүддьүөттэн 54 млрд. солк. Саха сиригэр 2023 сылга 56 социальнай эбийиэк тутуллубут, ол иһигэр 30-ча эбийиэк национальнай бырайыактар  хайысхатынан. Бу сыллааҕы национальнай бырайыактар түмүктэниэхтэрэ. Быйыл олоххо 74 социальнай инфраструктура эбийиэктэрин, итинтэн 32 национальнай бырайыактар чэрчитинэн киллэрэр былааннаахпыт», — диэн Дьулустаан Борисов кэпсээтэ.

Мунньах кыттыылаахтара элбэх боппуруостары, этиилэри уонна баҕа санааларын эттилэр. Чуолаан, Дьокуускай куораттааҕы уокурукка тыа хаһаайыстыбатын өйөөһүн дьаһалларын туһунан боппуруос көрүлүннэ. СӨ Тыатын хаһаайыстыбатын миниистирэ Артем Александров куораттааҕы агробырамыысыланнай комплексы сайыннарыыга бааһынай хаһаайыстыбаларынан 2023 сылга Дьокуускай куорат агломерациятыгар 30 мөл. солк. түҥэтиллибитин, ол иһигэр Маҕан, Марха уонна Хатас сэлиэнньэлэригэр граннар иһинэн бэриллибитин санатта. Кини 2024 сылга эмиэ граннарга куонкурус ыытылларын иһитиннэрдэ.

Хатас сэлиэнньэтигэр биэрэги бөҕөргөтөр үлэни ыытар наадатын туһунан боппуруос киирдэ. СӨ Экологиятын миниистирин бастакы солбуйааччы Дьулустаан Хон «Комплексная защита территории ГО «г. Якутск» от Табагинского мыса до Кангаласского мыса» бырайыактыыр- сметнэй дөкүмүөнү оҥорууга бырайыактыыр үлэлэргэ Главгосэкспертизаҕа көрүүгэ киллэриллибитин иһитиннэрдэ. Ону таһынан, 2021 сылга Хатас, куорат таһынааҕы уонна Табаҕа бөһүөлэктэригэр үс учаастагы бөҕөргөтөр үлэлэр ыытыллыбыттарын санатта.

Хатас сэлиэнньэтигэр баһаарынай чаас саҥа дьиэтин тутуутун туһунан боппуруос этилиннэ. СӨ Гражданскай оборуона дьыалаларыгар уонна нэһилиэнньэ олоҕор-дьаһаҕар куттал суох буолуутун хааччыйар миниистирэ Дмитрий Лепчиков ПЧ- 8 баһаарынай чааһын тутуу Хатас сэлиэнньэтигэр 19 уочаракка турарын иһитиннэрдэ.

Сиһилии манна аах.

 СӨ Ил Дарханын уонна Бырабыыталыстыбатын пресс- сулууспата

Хаартыска: Мария Васильева, СИА