Хатас суолун учаастагар фото-видеокамераны туруордулар

Хатас сэлиэнньэтигэр суол быраабылатын кэһиини бэлиэтиир стационарнай комплекс үлэҕэ киирдэ. Бу туһунан Саха сиринээҕи Суолларын управлениетыгар иһитиннэрдилэр.

«Хатас» эрэгийиэннээҕи суолун 3-с км + 579 м учаастагар турар тиһик утары суол балаһатыгар тахсыыны, суол бэлиэлэрин  ирдэбиллэрин кэһиини, ону тэҥэ түргэн тэтимнээх сырыыны бэлиэтиир. Ону таһынан, «Нам» суолун 12-с км + 292 м учаастагар 40 км-тан түргэн тэтимнээх сырыыны бэлиэтиир камера үлэлиир. Суол саҥардыллыан иннинэ, бу комплекс 13-с км + 783 м учаастагар баара.

Бэлиэтээн эттэххэ, фото-видео тиһиктэр  ГАИ сулууспатын кытта сөбүлэһэн, суол саахала тахсар учаастактара быһаарыллан истэхтэрин аайы саҥа сирдэргэ туруоруллаллар уонна көһөрүллэллэр. Бу үлэ сылы быһа ыытыллар. Суол быраабылатын кэһии туһунан иһитиннэрии ИДьМ сулууспатын ГАИ салаатыгар Административнай быраабы кэһиини автоматическайдык бэлиэтиир киинигэр быһаччы бэриллэллэр.