Хатылы: Кулууп уонна балыыһа кыһалҕата

Хатылы: Кулууп уонна балыыһа кыһалҕата

Ааптар:
14.02.2024, 10:00
Егор Карпов хаартыскаҕа түһэриитэ.
Бөлөххө киир:

Хатылыга СӨ Бырабыыталыстыбатын үлэтин туһунан отчуоту истэн баран ыйытыыларга киириигэ Хатылы урукку баһылыга Ульяна Атласова тылы бастакынан ылла.

“Биһиги дэриэбинэбитигэр 2017 сылтан кулууппут сабыллан турар. Ол иннинэ 1969 сыллаахха көһөрүллэн кэлбит дьиэни кулууп оҥостон олорбуппут. Олох эргэрэн, хаарбах тутуунан билиниллэн сабыллыбыта. Онтон ыла дьон мустар сиринэн успуорт саалата буолла. Билигин бу мунньахтыы олорор дьиэбитигэр биир муннукка тусталлар, иккис муннукка ыллыыллар, ону ким сөбүлүөй? Аны туран бу тутуу кэнсиэрдииргэ сөбө суоҕун бэйэҕит көрөҕүт – акустиката мөлтөх, ой дуорааннаах, киһи саҥата иһиллибэт. Дьиҥэр, кулууп, аныгылыы эттэххэ, норуот айар киинэ буолан, дэриэбинэҕэ сүдү суолталаах эбийиэгинэн билиниллиэхтээх. Манна куоракка курдук тыйаатыр, түмэл эгэлгэтэ суох, онон дьону түмэр сир хайаан да баар буолуохтаах. Кулууп туттараары өр үлэлэстибит, иккис бырайыак оҥотторбуппут, араас хайысханан туруорса сатыыбыт. Бу этиибин туруорсуунан ааҕан боротокуолга киллэриҥ, үлэҕэ ылыҥ!” — диэн эттэ.

Егор Карпов хаартыскаҕа түһэриитэ.

Бу туруорсууга Чурапчы улууһун дьокутаата Дмитрий Поисеев маннык хардарда: “Ульяна Николаевна, бу кыһалҕа баарын билэбит, быыбардааччылар накаастарын иһигэр киирбитэ. Билигин эһиги киллэрбит Норуот айар дьиэтин уонна Көһөрүү түмэлин холбуур бырайыаккыт, хомойуох иһин, аныгы ирдэбиллэргэ сөп түбэспэт, онон актуализация ирдэнэр. Бу хайысхаҕа үлэ бара турар, сорудах баар, онон кэлэр кэм тутууларыгар уочаракка туруорарга үлэлиибин”.

Учуутал Айталина Николаевна Чичигинарова доруобуйа харыстабылын кыһалҕатын көтөхтө. “Хатылыга 25 миэстэлээх балыыһа үлэлиир этэ. Билигин ол дьиэтэ баар, ол эрээри үлэлээбэт. Нэһилиэккэ биир терапевт быраас баар этэ, ол кыыспыт оҕолоноору сылдьар, билигин эмтиир бырааспыт суох. Онон ыйытыыларым бу курдуктар. Бастатан туран, сытар миэстэлээх балыыһа үлэлиэ дуо? Иккиһинэн, бырааһы солбуйар үлэһит кэлиэ дуо? Үһүс боппурус – быраас тиийбэтэ өрөспүүбүлүкэ үрдүнэн турар кыһалҕа. Онон сибэсстээн бырааска үөрэниэн баҕалаах оҕолорго киирэр эксээмэни чэпчэтэр сатаммат дуо? Сорох оҕолор быраас үөрэҕэр бааллара хапсыбакка төннөллөр. Оччо баҕалаах оҕолору ылан үөрэтиэххэ ээ, оччоҕуна кыһалҕа кыччыа этэ”, — диэн ыйыталаста.

Бу ыйытыыларга улуус исписэлииһэ хоруйдаата: “Сытар балыыһа үлэлииригэр нэһилиэнньэ ахсаана сөп түбэһэр буолуохтаах, Хатылы ол квотаҕа хапсыбат. Дьиҥэр, сытар балыыһа Хатылыттан сэттэ килэмиэтир чугас Чуапчыга баар, саҥа поликлиникаҕа үһүс этээскэ 23 сытар куойкалаах терапия салаата үлэлиэҕэ. Бу поликлиника киин куоракка баар балыыһаларга тэҥ таһымнаах тиэхинькэнэн, эмтиир быраастарынан хааччыллыаҕа. Томография тэрилэ баар, аныгы рентген хоһо аһылынна, стоматология үлэлиэҕэ, педиатрия салаата аһыллар. Оттон уоппускаҕа барбыт бырааскыт оннугар “выездной быраас” нэдиэлэҕэ биирдэ кэлэн көрөр буолуоҕа”.

Улуус баһылыга Степан Саргыдаев үөрэх туһунан эбэн эттэ: “Агротехнологическай кэллиэс баазатыгар Дьокуускайдааҕы медкэллиэс филиала аһыллыбыта, онно 30 оҕо “эмтиир үлэ” уонна “сиэстэрэ үлэтэ” салааҕа үөрэнэ сылдьар. Бу оҕолор үөрэхтэрин бүтэрдэхтэринэ, Чурапчыга эмтиир үлэ хайысхатыгар балаһыанньа тупсуо диэн эрэллээхпит. Бырааска үөрэнэр оҕолоох буоллаххытына, дойдуларыгар кэлллинэр, ыҥыра оллоруҥ диэн этиэм этэ. Дьиэнэн хааччыйыахпыт, көмөлөһүөхпүт!”

Ульяна Атласова уонна Айталина Чичигинарова Бырабыыталыстыба отчуоттуур үлэтин үрдүктүк сыаналыылларын туһунан эттилэр. Айталина Николаевна: “Бырабыыталыстыба үлэлиирэ көстөр, олоҕу кытта тэҥҥэ сайдан, сөптөөх быһаарыылары ыларын көрөбүт”, — диэн тылын түмүктээтэ.

+1
0
+1
0
+1
1
+1
0
+1
0
+1
0
+1
0
Бары сонуннар
Салгыы
24 мая
  • 13°C
  • Ощущается: 11°Влажность: 35% Скорость ветра: 0 м/с

Сообщить об опечатке

Текст, который будет отправлен нашим редакторам: