Хатыҥ Арыы дьахталлара куоракка кэлэн таҥас тигэр сыахха үлэлээтилэр

Бу күннэргэ Нам улууһун  Хатыҥ Арыы нэһилиэгин  Дария Мальцева  салайааччылаах дьахталлар уонна Оксана Лебедева  бэрэссэдээтэллээх  бэтэрээннэр сэбиэттэрин көҕүлээһиннэринэн, 6 дьахтар түмсэн, Дьокуускайга, «Илии сылааһа» диэн байыаннай дьайыыга барар уолаттарга анаан таҥас тигэр сыахха үлэлээн кэллилэр диэн «Нам  улууһа» МТ пресс-сулууспата иһитиннэрдэ. 

Хас биирдии кэрэ аҥаар биирдии байыаннай көстүүм тигэн күүс-көмө буолла. «Илии сылааһа» бырайыак чэрчитинэн, сыах иистэнньэҥнэрэ Кыайыы күнүн кэнниттэн Нам улууһугар тахсан үлэлиир, үөрэтэр былааннаахтар. Онуоха үлэ хаачыстыбата ирдэнэр.

Хатыҥ Арыы нэһилиэгин  уопсастыбаннаһа  иистэнэр дьоҕурдаах, баҕалаах дьону бу тэрээһиҥҥэ көхтөөхтүк кытталларыгар ыҥырар.  Кыайыы туһугар бары бииргэ сомоҕолоһон үлэлиэххэ, уолаттарбытыгар күүс-көмө, өйөбүл буолуохха диэн «Нам улууһа» МТ пресс-сулууспата иһитиннэрдэ.