Хатыҥ арыыга “Своих не бросаем” аахсыйанан байыастар дьиэ кэргэттэрин өйүүллэр

Нам улууһун Хатыҥ Арыы нэһилиэгэр  байыастар дьиэ кэргэттэрин өйүүр “Своих не бросаем” бүтүн улуустааҕы аахсыйа көхтөөхтүк ыытыллар. Бу туһунан энсиэли.рф суруйар.

Нэһилиэк тэрилтэлэрэ уонна олохтоохторо байыаннай дьайыыга сылдьар биир дойдулаахтарын дьиэ кэргэттэригэр араас өрүттээх көмөнү оҥороллор. Ол курдук, Намнааҕы тиэхиньикум үлэһиттэрэ түөрт ыалга муус киллэрэн, үрүҥ аһынан уонна оҕуруот аһынан хааччыйдылар. Оттон «Хатыҥчаан» устуудьуйа, олохтоох уонна Граф Биэрэгин «Самородок» бибилиэтиэкэтэ, буоста үлэһиттэрэ кыттыһан, шефтэһэр ыалларыгар ас-үөл, оҕуруот аһа тиэртилэр.

Аахсыйа иккис хайысхатынан – байыаннай дьайыыга сылдьар уолаттарга аналлаах баһыылкалары хомуйуу буолар. Бу күннэргэ «Чэбдик» хаамыы бөлөҕө (салайааччы Н.Д. Наумова) анал баһыылканы, оттон олохтоох Владимир Сивцев илим туттардылар. Хомуллубут көмө бүтүннүүтэ алтынньы 31 күнүгэр түмүллэн, улуустааҕы дьаһалта ыстаабыгар туттарыллыаҕа.