Хатыҥ чээрэтиттэн сиробу кэрэхсииллэр

Дьокуускайга “Ас-үөл” өрөспүүбүлүкэтээҕи быыстапка- дьаарбаҥка ыытылла турар. Онон куорат олохтоохторо уонна ыалдьыттара дьаарбаҥкаттан ас-үөл, араас тыа хаһаайыстыбатын бородууксуйатын атыылаһаллар.

Ким эт, үүт, оҕуруот аһын атыылаһарын быыһыгар доруобуйатын эмиэ көрүнэр эбит. Ол курдук, “Тайга Якутии” фирма оҥорон таһаарар сироптарын дьон олус сэргээтэ. “Сироп из плодов боярышника”, “Пихтовый сироп с плодами можжевельника”. “Сосновый сироп” диэн бытыылкалаах сироптары үгүс киһи ылла.

Ордук “Сироп из чаги” диэн хатыҥ чээрэтиттэн оҥоһуллубут сиробу ыйыталлар. Бу чээрэ искэҥ ыарыыта үөскүүрүн тохтотор эбит. Сүрэххэ, куттах-оһоҕос ыарыыларыттан көмөлөһөр диэн суруллубут.

“Дьокуускайга оҥорон таһаарабыт. Бородууксуйабытын олохтоох маҕаһыыннарга туттарабыт. Онно хас сыанаҕа атыылыылларын билбэппит. Биһиги бэйэбит сыанабыт – 300 солкуобай”, — диэтилэр сиробу таһаарааччылар.

Дьаарбаҥка өрөбүлгэ түмүктэниэҕэ. Кытаатыҥ, кыстыыр аскытын-үөлгүтүн хаһааныҥ!