Хатырыкка 6 саҥа хотон тутуллубут, өссө икки тутуллуохтаах

Быйыл Нам улууһун Хатырык нэһилиэгин дьоно 449 сылгыны, 773 ынах сүөһүнү кыстатан туруораллар. 6 бааһынай-фермерскэй хаһаайыстыба баар, сүүсчэкэ ыал кэтэх сүөһүнү тутар.

Бу  быр-бааччы олохтоох чуумпу нэһилиэккэ ыам ыйын биир күнүгэр соһуччу халаан уута тоҕо анньан кэлбитэ. Аҕыйах чаас иһигэр олохтоохтор кыстатан таһаарбыт 147 ынах сүөһүлэрин, 101 сылгыларын, 27 ыҥырыа дьиэ кэргэнин көрбүтүнэн былдьаппыттара.

“Ити улахан хоромньуну гуманитарнай көмөнөн толунан саптыбыт, — диэн кэпсиир тыа хаһаайыстыбатын исписэлииһэ Саргылаана Парникова. — Ол курдук улаханныын кыралыын 212 ынах сүөһү кэлбитэ: Кэбээйиттэн 46, Ньурбаттан, Сунтаартан 26, Мэҥэ Хаҥаластан 16, Нам нэһилиэктэриттэн 15, Хатастан, Хаҥаластан 26, Амматтан 35, Чурапчыттан 31. Улахан хоромньуну көрсүбүт Александра Слепцова КФХ-гар анаан 17 ыанар ынах кэлбитэ. Маны таһынан хатастар 29 сибиинньэ оҕотун ыыппыттара. “Туймаада” агрохолдинг, “Тимин”, “Эрэл” хампаанньалар, улуус дьаһалтата уотурбанан, ыһыы хортуосканан көмөлөспүттэр. Түбэттэн 26 рулон оту аҕалбыттара”.

Алдьатыылаах халаан уутугар дьиэ-уот эрэ эмсэҕэлээбэт, тиэргэн иһинээҕи тутуу, ол иһигэр хотон эмиэ эмсэҕэлиир. Онон 32 хотонтон аҕыһа туһатыттан тахсыбыт диэн быһаарыллыбыт, 24 хотону өрөмүөннүөххэ сөп диэн буолбут. Аакталамматах 16 хотоҥҥо улуус уонна Хатырык нэһилиэгин дьаһалталара көмөлөөн, тутуу матырыйаалын биэрбиттэр. Ити 8 туһатыттан тахсыбыт хотон оннугар былырыын 6 хотон саҥаттан тутуллубут, 2 хотон быйыл  тутуллуохтаах.

Хатырык олохтооҕо Парникова Саргылана Михайловна хотонун уу эмиэ олоччу ылан барбыт.

— Хата биһиги сүөһүбүтүн эрдэ Атамай диэн сиргэ илдьэн, үөһэ хаайбыппыт, онон 100 бырыһыан хаалбыттара. Ол эрээри 10 төбөлөөх биир үөрбүт ууга былдьаммыта, онон бу үксүн эдэр сылгылары иитэн туруорабыт. Дьон уонна аймахтар көмөстүлэр. Бу хотоммут өһүөтүгэр тиийэ кэриэтэ барбыта. Тыа хаһаайыстыбатын министиэристибэтин көмөтүнэн харчы көрүллэн, адьас саҥа хотон тутулунна. Билигин 28 сүөһү холкутук кыстаан турар, — диэн хаһаайка кэпсээтэ.

Дьон халааҥҥа былдьаппыт сүөһүлэрин, сылгыларын ороскуота толору төлөммүт. Ону таһынан сылгынан, ынаҕынан көмөлөспүт бары хаһаайыстыбаларга, дьоҥҥо, Тыа хаһаайыстыбатын министиэристибэтигэр, өрөспүүбүлүкэ салалтатыгар хатырыктар улахан махталларын тиэрдэллэр.