ХИФУ 5,5 тыһ. устудьуону ыларга бэлэм

Хотугулуу-Илиҥҥи федеральнай университет бастакы кууруска 500 кэриҥэ хайысхаҕа 5,5 тыһ. тиийэ устудьуону ылар. Итинтэн 3555 киһи күнүскү үөрэххэ. Бу туһунан университет ректора Анатолий Николаев “Саха” НКИХ интервью биэрэригэр кэпсээтэ. Абитуриеннары ылыы бэс ыйын 20 күнүттэн саҕаламмыта.

4,5 тыһ. эдэр дьон бүддьүөт миэстэтигэр үөрэниэхтэрэ, өссө 1200-1400 – төлөбүрдээххэ. Быһа холуйан устудьуон 10 %, бырамыысыланнайа суох тэрилтэлэр, балыыһалар уонна оскуолалар сакаастарынан тус сыаллаах үөрэххэ киириэҕэ.

Байыаннай эпэрээссийэ кыттыылаахтарыгар туспа миэстэлэр тыырылыннылар – кинилэр бэйэлэрэ уонна  оҕолоро туспа куонкурустаһыахтара. Маныаха оҕолорго кубуота өссө ааспыт сылтан көрүллэр.

ХИФУ Петербурдааҕы норуоттар икки ардыларынааҕы экэнэмиичэскэй пуорумҥа кыттыыта, суолталаах сөбүлэҥнэргэ илии баттаһыы, инникитин норуоттар икки ардыларынааҕы таһымҥа  тахсыыга үрдүк үөрэх тэрлтэтэ Арктикаҕа каадыры бэлэмнээһини сайыннарыы хайысхата суолталааҕын бигэргэттэ.

— Арктикаҕа ураты каадырдар наадалар, — диэн ректор этэр. —  Арктика  —  ураты, бэйэтэ туспа көрүүлээх, ирдэбиллээх. Холобур, биһиги 90-тан тахса Арктика оскуолатыгар, итинтэн 7 көс оскуолаҕа учууталлары бэлэмниибит. Көс оскуолаҕа уонна лиссиэйгэ учууталы бэлэмниир биир буолбатах. Кинилэр хотугу сир үлэтин тус уратытын, онно олорооччулар култуураларын, норуоттарын үгэһин билиэхтээхтэр, баҕар, хас даҕаны идэни баһылыахтаахтар.

Бу атын хайысхаларга эмиэ сыһыаннаах. Билигин Уус Куйгаҕа кыра кыамталаах атомнай электростанция тутулла турар. Ол аата биһиги онно үлэлиир энэргиэтиктэри бэлэмниэхтээхпит. Урукку өттүгэр биһиги маннык исписэлиистэри хаһан даҕаны бэлэмнии иликпит эрээри, номнуо билиҥҥиттэн бииргэ үлэлэһэр тэрилтэлэрбитин кытта үөрэххэ дуогабардары түһэрсэбит. Уот аттынааҕы сирдэргэ эмиэ холбонуоҕа. Ол аата сиртэн хостонор баайы булар бырамыысыланнаска исписэлиистэр, тиэхиньиичэскэй каадырдар ирдэниэхтэрэ. Ол иһин биһиги бу кэнсиэпсийэни ылабыт уонна бу бырагырааманан үэлээн саҕалыыбыт.

Интервью түмүгэр Анатолий Николаев үөрэххэ туттарсааччылар эксээмэннэрин ситиһиилээхтик ааһан, инникигэ эрэллээхтик хардыылыылларыгар баҕа санаатын эттэ.