ХИФУ байыаннай үөрэтэр киинигэр устудьуоннары үөрэтии саҕаланна

Хотугулуу-Илиҥҥи федеральнай университет байыаннай үөрэтэр киинигэр сапппааска сылдьар саллаат бырагырааматынан байыаннай бэлэмнэниигэ киирбит устудьуоннарга үөрэхтэрэ саҕаламмыт. Үөрэх икки взводун тэрийбиттэр, эдэр дьон 1,5 сыл үөрэнэллэр.

Үөрэххэ сүүмэрдиир күрэһи ситиһиилээхтик ааспыттар киирбиттэр. Манна байыаннай быраастар хамыыһыйалара, эт-хаан өртүнэн бэлэмнээх буолуу уонна сүрүн исписээлинэстэригэр ситиһии киирэр. Тустаах кииҥҥэ кууруска үөрэммиттэрин кэнниттэн, Благовещенскайга Уһук Илиҥҥи байыаннай училищеҕа 30 күннээх үөрэтэр түмсүүнү ааһыахтара. Саппааска сылдьар эрэдэбиэй байыаннай билиэтин университеты бүтэрбиттэрин туһунан дьупулуомнарын кытта бииргэ туттарыахтара.

“Онон курсааннар бэйэлэрин университеттарыгар үөрэнэ сылдьан байыаннай сулууспаны ааһар ураты кыахтаннылар. ХИФУга үөрэхтэрин бүтэрээт даҕаны үлэҕэ киирэр эбэтэр эбии байыаннай исписээлинэстээх буолан Сэбилэниилээх күүстэргэ, ФСБга, ИДьМ, ЫБММ, Росгвардияҕа о.д.а. ханнык баҕарар тэрилтэни талар кыахтаахтар”, – диэн ХИФУ байыаннай үөрэтэр киинин начаалынньыга, подполковник Геннадий Сысоев кэпсиир.

Юридическай бакылтыат 2-с кууруһун устудьуона Нюргун Николаев уонна физика-тиэхиньиическэй институт 3-с кууруһун устудьуона Святослав Федоров үөрэх икки взводун хамандыырдарынан анаммыттар. Байыаннай үөрэх киинигэр анаан-минээн киирбиттэрин, байыаннай сулууспаны үөрэнэр кэмнэригэр бэйэлэрин үөрэхтэрин кыһатыгар, чугас дьоннорун аттыгар ааһар кыаҕы туһанар соруктаах анаан-минээн киирбиттэрин туһунан этэллэр.

“Үөрэх күнэ, манна “байыаннай күн” диэн ааттанар, ханнык баҕарар университекка курдук 8:00 чаастан күнүскү аһылыкка тохтобуллаах 17:00 чааска диэри буолар. Күн бэрэбиэркэттэн, тус састаабы көрүүттэн уонна Судаарыстыбаннай былааҕы өрө көтөҕүү, Арассыыйа Өрөгөй ырыатын толоруу сиэриттэн саҕаланар. Ол кэнниттэн дьарыктар, байыаннай үөрэтэр киин преподавателлэрэ – улахан уопуттаах, сатабыллаах саппааска сылдьар аппыһыардар биһигини байыаннай дисциплиналарга үөрэтэллэр. Күммүт барыта аттарыллан турар, дьарыкка, паараҕа хойутааһыны началынньыктар кыраҕытык кэтииллэр. Үөрэх кэнниттэн ону ситиһэр ирдэнэр. Онон биһиги дьиссиппилиинэҕэ үөрэнэбит. Үөрэххэ кэтиэхтээх байыаннай пуорманы атыылаһыахтаахпыт. Бу үөрэх инники олохпутугар үчүгэй, туһалаах билиини иҥэрэригэр эрэнэбит” – диэн устудьуоннар эрэллээхтэр. Бу туһунан ХИФУ пресс-сулууспата суруйар.