ХИФУ бастыҥ устудьуоннарыгар «Аммосов» диэн бириэмийэлэри анаатылар

Бөдөҥ судаарыстыбаннай диэйэтэл Максим Кирович Аммосов төрөөбүтэ 125 сылынан Хотугулуу-Илиҥҥи федеральнай университет бастыҥ устудьуоннарыгар «Аммосов» диэн бириэмийэлэри үбүлүөйдээх тэрээһин кэмигэр ахсынньы 22 күнүгэр «Триумф» уораҕайыгар туттардылар.

Сыллата туттарыллар бириэмийэни үөрэххэ, научнай-чинчийэр, уопсастыбаннай, спортивнай, култуурунай, айар, волонтерскай үлэҕэ бэйэлэрин үтүөтүк көрдөрбүт алта устудьуоҥҥа биэрдилэр.

«Биһиги үөрэхпит кыһата сайдар, кэҥиир, онон Максим Аммосов аатын дьоһуннаахтык сүгэр дии саныыбын. Чаҕылхай Максим курдук дойдубут сайдыытыгар сирдьит буолуохпут диэн эрэнэбин», — диэн М.К.Аммосов аатынан ХИФУ ректора Анатолий Николаев эттэ.