ХИФУ дьиэтигэр уот турбутун быыһаатылар

Муус устар  1 күнүгэр М.К. Аммосов аатынан ХИФУ Ленин уулуссатыгар баар 3 этээстээх тэрилтэтигэр уот турбутун туһунан  баһаарынай-быыһыыр сулууспа дьуһуурунай чааһыгар иһитиннэрии киирбит.

Бу туһунан Арассыыйа ыксаллаах быһыыга-майгыга министиэристибэтин Саха сиринээҕи салаатын пресс-сулууспата иһитиннэрэр.

Уоту кытары охсуһааччылар 3 мүнүүтэнэн баһаар тахсыбыт сиригэр тиийбиттэр. Баһаарынайдар тиийиилэригэр дьиэттэн буруо тахсар эбит. Баһаар түмүгэр дьиэ анныгар баар 8 кв.м. иэннээх сиргэ электрическэй кабель умайда. Баһаар тахсыбыт төрүөтэ, буруйдаах уонна хоромньу быһаарыллар. Уоту умуруорууга  тус састааптан  38 баһаарынай уонна 8 тиэхиньикэ үлэлээтэ.