ХИФУ өйөбүлүнэн байыаннай дьайыы кыттыылаахтарын туһунан кэриэстэбил кинигэ бэчээттэниэ

Хотугулуу-Илиҥҥи федеральнай университет байыаннай дьайыы кыттыылаахтарын туһунан «Эһиги биһиги өйбүтүгэр-санаабытыгар хаалаҥҥыт, мэлдьи тыыннаах буолуоххут» диэн өрөспүүбүлүкэтээҕи кэриэстэбил кинигэни таһаарыаҕа.

Кинигэни оҥорууну былырыын чугас дьоннорун сүтэрбит огдооболор уонна ийэлэр көҕүлээбиттэрэ. Быйыл балаҕан ыйыгар тахсар бастакы таһаарыыга 241 буойун туһунан ахтыы киирдэ, өссө хас да туом тахсара былааннанар. «Кинигэҕэ тиэкистэри хомуйуу 2025 сыл кулун тутар 1 күнүгэр биллэриллибитэ. Биһиги 60-90 ахтыыны хомуйуохпут дии санаабыппыт, ол эрээри биллэриигэ 250-ча чугас дьон уолаттарын, кэргэттэрин, бииргэ төрөөбүттэрин уонна доҕотторун туһунан кэпсиэхтэрин баҕаран, хоруйдаабыттарыгар олус соһуйбуппут. Кэриэстэбил кинигэтин таһаарарга көмөлөһөрбөр көрдөһүүбүн ХИФУ бэрэсидьиэнэ Евгения Михайлова уонна төрөөбүт университетым өйөөбүттэрэ. Бу киэҥ далааһыннаах саҕалааһын – көннөрү ытыктабыл бэлиэтэ буолбатах, бу ыччат патриотическай өйүн-санаатын иитиигэ уонна норуоппут сомоҕолоһуутун бөҕөргөтүүгэ сүрүн оруолу оонньуур устуоруйа өйдөбүлүн үйэтитиигэ улахан суолталаах хардыынан буолар. Дьиҥнээх сыаннастар умнуллар аныгы кэмҥэ, Ийэ дойду иһин кыргыспыт дьон хорсун быһыыларын уонна бэйэни харыстаммакка кыайыыларынан туһунан саната сылдьарбыт олус наадалаах», – диэн кэпсиир кинигэ ааптара, ХИФУ филологическай факультетын старшай преподавателэ Розалия Макарова.

Ийэ дойдуларын иһин олохторун толук уурбут 241 дьоруой туһунан кырдьыктаах кэпсээннэр киирбит «Эһиги биһиги өйбүтүгэр-санаабытыгар хаалаҥҥыт, мэлдьи тыыннаах буолуоххут» кинигэ бастакы таһаарыыта бэлэмнэнэн, типографияҕа бэрилиннэ. Кинигэҕэ Арассыыйа Дьоруойдара Дмитрий Егоров, Петр Киприянов уонна Саха сирин 32 улууһуттан байыаннай дьайыы кыттыылаахтарын туһунан тиэкистэр киирдилэр. Кинигэни таһаарыыны өрөспүүбүлүкэ муниципальнай тэриллиилэрин баһылыктарын Сэбиэтэ эмиэ өйөөтө.

«Мин кэргэним Виталий Евгеньевич Макаров 2024 сыл балаҕан ыйын 13 күнүгэр ДНӨ Волновахскай оройуонун Владимировка нэһилиэнньэлээх пуунун аттыгар Угледары штурмалааһын кэмигэр өлбүтэ. Угледар – биһиги уолаттарбыттан элбэх киһи олоҕо быстыбыт куората. Мин дойду иһин олохторун толук уурбут буойуттар кэриэстэбиллэрин үйэтитиигэ бэйэм тус интэриэстээхпин», – диэн Розалия Макарова кэпсээтэ.

Преподаватель санаатынан, бу кинигэ чинчийээччилэргэ, педагогтарга уонна эрэгийиэн устуоруйатын интэриэһиргиир дьоҥҥо сыаналаах матырыйаал буоларынан эмиэ улахан суолталаах. «Биһиги кинигэ ыччат патриотическай тыынын үөскэтиигэ көмөлөһүө, норуоппут сомоҕолоһуутун уонна күүһүн бэлиэтинэн буолуо диэн эрэнэбит», – диэн кини эбэн эттэ.

«Бырайыагы өйөөбүтүн иһин университет ректорыгар Анатолий Николаевка махтанабыт. ХИФУ кинигэни үрдүк таһымнаахтык билиһиннэриэ, кинигэни таһаарыыга уонна дьоруойдар кэриэстэбиллэрин үйэтитиигэ сыһыаннаах санаалар олоххо киириэхтэрэ диэн эрэнэбит. Дойду эйэлээх олоҕун туһугар олохторун толук уурбут саха сирин буойуннарын кэриэстэбилин үйэтитиигэ бииргэ үлэлиэхпит», – диэн кинигэни хомуйан оҥорооччулар тиэрдэллэр.

Кинигэ ааптардара кэлэр таһаарыыларга анаан, өлбүт саха буойуннарын, кинилэр хорсун быһыыларын туһунан кэпсээннэри салгыы хомуйаллар. Ахтыы тиэкиһигэр буойун туһунан маннык информацияны сыһыарыахха наада: араспаанньыйата, аата, аҕатын аата, позывнойа, төрөөбүт уонна өлбүт күнэ-дьыла, төрөөбүт сирэ, сулууспатын көрүҥэ (баҕа өттүнэн, мобилизацияламмыт), сулууспатын саҕалаабыт күнэ-дьыла, сыбаанньата, дуоһунаһа, байыаннай чааһа, полката, өлбүт сирэ, көмүллүбүт сирэ уонна күнэ-дьыла, наҕараадалара.

Матырыйаалларга биир визитка уонна олохтон үс үрдүк хаачыстыбалаах хаартысканы сыһыарыахха наада. Бэлэм матырыйааллары el_ykt@mail.ru электроннай почтаҕа ыытыахха наада. Сурук тиэмэтигэр «Кэриэстэбил кинигэтигэр» диэн бэлиэтиигит.