ХИФУ уонна Дьокуускай куорат кииннэммит бибилиотечнай ситимэ төрөппүттэргэ аналлаах лекторийы саҕалаата

Психологияҕа аналлаах лекторий төрөппүттэр оҕолорун иитэллэригэр алҕаһы оҥорботторугар, оҕо уратытын учуоттуулларыгар уонна кинини сөптөөх суолга салайалларыгар көмөлөһүөҕэ. Бу сыл устата Хотугулуу-Илиҥҥи федеральнай университет психологияҕа институтун преподавателлэрэ Н.Д.Неустроев аатынан SMART-бибилэтиэкэҕэ лиэксийэлэри ааҕыахтара, маастар-кылаастары ыытыахтара.

ХИФУ психологияҕа институтун “Төрөппүттэргэ аналлаах лекториум” бырайыага сырдатар, иһитиннэрэр аналлаах. Институкка иһитиннэрбиттэринэн, лиэксийэлэр үөрэххэ туттарсааччылары уонна төрөппүттэри кытта үлэлиир салаа идэҕэ эрдэттэн туһаайар үлэтин иитинэн  ыытыллаллар. “Араас сэргэх лиэксийэлэр төрөппүттэр оҕолорун кытта кэпсэтэллэригэр көдьүүстээх сатабылы ылалларыгар, оҕо уйулҕатын өйдүүллэригэр уонна идэлэрин быһаарыналларыгар сүбэ-ама буолалларыгар көмөлөһөллөр. Бастакы, гаджет туһатын уонна буортутун туһунан лиэксийэ номнуо буолла. Кэлэр лиэксиэйэлэр хаһан ыытыллалларын туһунан иһитиннэрии институт уонна бибилэтиэкэ телеграм-ханаалларыгар тахсыаҕа” – диэн психология уонна социальнай билим кафедратын ассистена Мария Лаппарова этэр. Бу туһунан сиһилии ХИФУ саайтыгар ааҕыҥ.