ХИФУ уонна Кытай университета бииргэ үлэлэһиини кэҥэтэллэр

ХИФУ уонна Кытай ойуур хаһаайыстыбатыгар университета үөрэх эйгэтигэр бииргэ үлэлэһиини кэҥэтэллэр.

Арассыыйа- Кытай ЭКСПО чэрчитинэн М.К.Аммосов аатынан ХИФУ уонна ойуур хаһаайыстыбатын Хотугулуу-Илиҥҥи университетын (СВУЛХ) икки ардыларыгар бииргэ үлэлээһин туһунан меморандумҥа илии баттааһын буолла. Арассыыйа уонна Кытай үрдүк үөрэҕин кыһалара научнай-үөрэтэр үлэҕэ уонна устудьуоннары, исписэлиистэри хардарыта атастаһыы бырагыраамаларын тэрийиигэ бииргэ үлэлиир баҕалаахтар. Сөбүлэһиигэ илии баттааһыҥҥа СӨ Бырабыыталыстыбатын бэрэссэдээтэлин бастакы солбуйааччы Дьулустан Борисов салайааччылаах СӨ Бырабыыталыстыбатын дэлэгээссийэтэ кытынна.

Бастакы вице-премьер Кытайы кытары бииргэ үлэлээһин үөрэх эйгэтигэр эмиэ сайдан, кэҥээн иһэрин бэлиэтээтэ, үөрэх бырагыраамата элбиирин, устудьуоннар орто анал уонна үрдүк үөрэҕи ылалларын ыйда.

«Бииргэ үлэлээһин сүрүн соругунан Саха сиригэр ойуур хаһаайыстыбатыгар саҥаны киллэрии уонна ойуур бырамыысыланнаһын саҥа хайысхаларын олоххо киллэрии буолар. Биһиги тулалыыр эйгэни харыстааһыҥҥа, инновационнай ньымалары ырытан оҥорууга уонна үөрүйэҕи атастаһыыга, научнай-үөрэх кииннэрин тэрийиигэ үлэлэһэргэ эрэнэбит», — диир кини.

Дьулустан Борисов үөрэх бырагыраамаларын тэрийии бырайыактарын олоххо киллэрии ойуур хаһаайыстыбатын салааларыгар үөрэнэр устудьуоннар, исписэлиистэр стажировкаланалларыгар, экологическай туризмы сайыннарарга, ойуур пааркаларын уонна туристическай маршруттары, ойуур уонна айылҕа харыстабылыгар экологическай хампаанньалары уонна туристическай маршруттары тэрийэргэ туһуланарын бэлиэтиир.

«Өрөспүүбүлүкэҕэ уонна университекка ойуур хаһаайыстыбатын каадырдарын бэлэмнээн таһаарыы улахан суолталаах. Ойуур — биһиги баайбыт. Биһиги ону сөпкө туһана үөрэниэхтээхпит. Ону сэргэ бу сыаналаах айылҕабыт ресурсатын харыстыахтаахпыт, оннук үөрэтиэхтээхпит. Мин биология наукатын дуоктара буоларым быһыытынан, ойуур тиэмэтигэр болҕомтобун уурабын, долгуйабын. Кини этэҥҥэ туруута элбэхтэн тутулуктаах. Онуоха ол хас биирдиитэ болҕомтону, дириҥник үөрэтиини ирдиир. Ойуур салаатыгар туһулаан, ХИФУ элбэх хайысханан үлэлиир. Ойуур хаһаайыстыбатын  Хотугулуу-Илиҥҥи университетын кытары биһиги бырагыраамаларга, наука чинчийиилэригэр ыкса ылсан үлэлэһиэхпит, устудьуоннары уонна преподавателлэри атастаһыыны быһаарыахпыт«, — диэн этэр ХИФУ ректора Анатолий Николаев.

Кини маны таһынан, икки дойду үрдүк үөрэҕин кыһалара бииргэ үлэлээһининэн, научнай-үөрэтэр хардарыта сибээстэһиинэн эрэ муҥурдаммакка, нэһилиэнньэҕэ, ол иһигэр оскуола саастаах оҕолорго экологическай билиини-көрүүнү үрдэтэрэригэр эрэнэрин биллэрдэ.

«Биһиги университеппыт ойуур хаһаайыстыбатыгар идэтийэр, ол эрээри, ХИФУ дэлэгээссийэтин кытары кэпсэтии, сөбүлэһиини түһэрсии кэнниттэн, элбэх хайысханан хардарыта сибээстээх үлэлэһиэхпитин сөп диэн эрэнэбин. Тэхиньиичэскэй, технологическэй, гуманитарнай дьиссипилиинэлэргэ кэскил баар. Ойуур хаһаайыстыбатын эйгэтигэр сөбүлэһиигэ илии баттааһын көдьүүстээхтик бииргэ үлэлээһин саҕаланыыта эрэ буолар», — диэн ойуур хаһаайыстыбатын Хотугулуу-Илиҥҥи университетын ректора Сун Вэньлун этэр.

СӨ Ил Дарханын уонна Бырабыыталыстыбатын пресс-сулууспата

Хаартыскалар: СӨ Ил Дарханын уонна Бырабыыталыстыбатын пресс-сулууспатыттан