Хаартыска: кыттааччылар тус архыыптарыттан.
Хотугулуу-Илиҥҥи федеральнай университет 5-с кууруһун устудьуоннара Валентина Адамова уонна Александр Слепцов “Фтизиатр” диэн сыһыарыыны оҥорбуттар. Арассыыйаҕа маннык сыһыарыы билиҥҥитэ суох.
“Фтизиатр” сыһыарыыны нэһилиэнньэҕэ уонна араас хайысхалаах быраастарга иһитиннэрэр портал быһыытынан оҥорбуттар.
Валентина Адамова сыһыарыы, нэһилиэнньэҕэ сэллик ыарыытын туһунан иһитиннэриини кэҥэтии быһыытынан эмиэ туттуллуон сөп диэн этэр. Манна улахан дьоҥҥо да, оҕолорго даҕаны тыынар уоргаҥҥа уонна тыҥаттан атын сиргэ баар сэллик ыарыытын диагноһын туруорарга ирдэнэр сибикилэр толору суруллуохтара.
Сотору кэминэн бырайыак ааптардара оҥоһуктарын патеннатарга сайаапка биэриэхтэрэ. Күн бүгүн Валентина Адамова уонна Александр Слепцов сыһыарыыны салгыы ситэрэн-хоторон биэрэргэ хамаандаларыгар ИТ-исписэлииһи көрдүүллэр. Ол кэнниттэн “Фтизиатр” сыһыарыыны төлөпүөҥҥэ хачайдыахха сөп буолуо.
“Арассыыйаҕа маныаха атыылыы сыһыарыы суох, ол иһин, сыһыарыыбыт суолталаах диэн толкуйдуубут. Сыһыарыы сэллик ыарыытын сэрэтэргэ көмөлөһүө дии саныыбыт. Өйүкпүт (идея) элбэх, салгыы үлэлиэхпит. Салайааччыбыт Надежда Андреевна Гуляева көмөлөһөр. Биһиги иккиэн бэһис кууруска үөрэнэбит, олохпутун мэдиссиинэҕэ аныыр былааннаахпыт”, — диэн Валентина Адамова этэр.
Устудьуоннар мэдиссиинэ билимин хандьыдаата, ХИФУ Мэдиссиинэҕэ институтун сыстыганнаах ыарыылар, фтизиатрия уонна дерматовенерология хаапыдыратын дассыана Надежда Гуляева салайар “Фтизиатр” куруһуогар дьарыктаналлар.
Валентина тустаах куруһуокка бастакы куурустан сылдьар, үһүс куурустан “Фтизиатр” СНК бэрэссэдээтэлэ. Александр куруһуокка үһүс куурустан кыттыбыт.
ХИФУ Мэдиссиинэҕэ институтун устудьуоннарын оҥоһууларын Педагог уонна уһуйааччы сылыгар анаммыт эдэр исписэлиистэргэ уонна ординатордарга аналлаах үһүс Гаврильевскай ааҕыылар тэрээһин иитинэн билиһиннэрдилэр. Кэмпириэнсийэ Е.Н. Андреев аатынан “Фтизиатрия” научнай-практическай кииҥҥэ буолла.
ХИФУ пресс-сулууспата
Муус устуутун туругун туһунан бүгүн, ыам ыйын 11 күнүгэр, Саха сирин Быыһыыр сулууспатын начаалынньыга Иннокентий…
Ыам ыйын 9 күнэ – дириҥ өйдөбүллээх ытык күн. Сүһүөхтээх бэйэбит сүгүрүйэн туран, Аҕа дойду…
Бүгүн, ыам ыйын 11 күнүгэр, "Россия 24" ханаалга 19:00 ч. "Саха" ГТРК "Вместе с Айсеном Николаевым"…
Архыып чахчылара тугу кэпсииллэрий? Хапсаҕайга ыйааһынынан хаһааҥҥыттан араарар буолбуттарый? Успуорт бу көрүҥэ хаһааҥҥыттан киэҥник тарҕаммытый?…
Саха сирин Уопсастыбаннай балаататын бэрэссэдээтэлэ Станислав Иванов "Саха сирэ - дьоуойдар дойдулара" бырагыраама туһунан санаатын…
2025 сыл тохсунньу 22 күнүгэр Москваҕа “Кыһыл көмүс мааска” тыйаатыр национальнай бириэмийэтигэр уонна бэстибээл-куонкуруска номинаннары…