ХИФУ устудьуоннарыгар Биэрэк Үрдүн олохтоохторо истиҥник махтаннылар

Бу күннэргэ Өймөкөөн улууһугар от ыйынааҕы айылҕа иэдээнин кэнниттэн нэһилиэктэри чөлүгэр түһэрии кэмигэр үгүс улуустартан, бөдөҥ тэрилтэлэртэн тутуу биригээдэлэрэ кэлэн, олохтоохторго көмөлөстүлэр.

Кинилэр ортолоругар Өймөкөөнтөн 7 биэрэстэлээх Биэрэк Үрдүгэр үлэлээбит М.К Аммосов аатынан ХИФУ устудьуоннара бааллар. 16 устудьуон, 3 университет үлэһитэ  түөрт бөлөххө арахсан, олус таһаарыылаахтык үлэлээтилэр.  Кинилэр ууттан улаханнык эмсэҕэлээбит дьиэлэр муосталарын көтүрдүлэр, буор тастылар, тутуу матырыйаалын тиэйдилэр.

Ыччаттар кулуупка олордулар, “Чуораанчык” уһуйааҥҥа күҥҥэ үстэ аһыы сырыттылар.  Кинилэргэ минньигэс, тотоойу, иҥэмтэлээх аһы Алена Винокурова, Саргылана Атласова астаатылар. Пуобардар көмөлөһөөччүлэринэн олохтоох ыччаттар сырыттылар. Ол курдук, Алма-Ататааҕы технология университетын устудьуона Сайаана Винокурова уонна абитуриенныы сылдьар, быйыл оскуоланы бүтэрбит Джулиана Винокурова асчыттарга улахан көмөнү оҥордулар. Устудьуоннарга олохтоохтор эмиэ ас аҕалан, ыччаттар тот сырыттылар.

ХИФУ усутудьуоннара Өймөкөөн олохтоохторун санааларын да көтөҕөөрү, махталларын  да биллэрэн, сынньалаҥ дьоро киэһэтин бэлэхтээтилэр. Бу тэрээһин сыыйа ыччаттары атаарыыга туһуламмыт Махтал дьоро киэһэтинэн буолла. Нэһилиэк баһылыга Павел Васильев  уустук кэмҥэ аттыбытыгар  сылдьан сүҥкэн көмөнү оҥорбут устудьуоннарга олохтоохтор ааттарыттан барҕа махталын тиэртэ. Бука барыларыгар дохсун ытыс тыаһынан доҕуһуоллатан, “Тымныы оройо Өймөкөөҥҥө» кэлэ сылдьыбыттарын туоһулуур сэртэпикээттэри туттаран үөртэ.

Тэрээһини устудьуоннар идэлээх сойуустарын, «Ыччат гвардиятын » салайааччыта Сергей Никифоров салайан ыытта. Кини Биэрэк Үрдүгэр кэлиэхтэриттэн ыла төрөппүт оҕолоругар курдук ийэлии-аҕалыы ураты истиҥ, үтүө сыһыан иһин истиҥник махтанна. Хас биирдии ыччаты аатын ааттаан туран, олохтоохтор өйдөбүнньүк бэлэхтэри утары ууннулар. Устудьуоннар Өймөкөөҥҥө бастакы сырыылара эбит. «Өймөкөөнү олус сөбүлээтибит: дьикти кэрэ хатыламмат айылҕатын, ыалдьытымсах, үтүө майгылаах дьонун-сэргэтин хаһан да умнуохпут суоҕа», — диэн эттилэр. Ыччаттар аныгылыы тэтимнээх үҥкүүлэрэ, бэйэлэрэ айбыт ырыалара, «Аттар үҥкүүлэрэ», ВИА-нан толоруулара – дохсун ытыс тыаһынан арыалланна. Күргүөмнээх үлэ быыһыгар уолаттар иллэҥ кэмнэригэр ырыаларын, үҥкүүлэрин бэлэмнээбиттэрин сөхтүбүт.

Усуйаана, Уус Алдан, Орто Халыма, Ньурба уо.д.а. улуустартан сылдьар араас факультет устудьуоннара  түмсэн кэлэн, биир сомоҕо буола түспүттэрэ ордук долгутуулаах. Олохтоохтор сарсыҥҥы күнүгэр үлэлэрин түмүктээн барар  ыччаттарга “өрүү маннык олох инники күөнүгэр сылдьар дьоҥҥо сайдыы аартыга арыллан истин!” диэн алгыы хааллылар.