ХИФУга мэдиссиинэ идэтигэр туттарсыыга саҥаны киллэрии туһунан быһаардылар

Ааспыт нэдиэлэҕэ Хотугулуу-Илиҥҥи федеральнай университекка үрдүк үөрэх кыһатын мэдиссиинэ институтун бэрэстэбиитэллэрэ үөрэххэ туттарсааччылары, төрөппүттэри, педагогтары кытта көрүстүлэр.

Институт дириэктэрэ Николай Гоголев 2026 сылга үрдүк үөрэххэ мэдиссиинэ хайысхатыгар туттарсыыга туох саҥа уларыйыылар киирэллэрин билиһиннэрдэ. Мэдиссиинэ хайысхатыгар бүддьүөт миэстэтин 80% тус сыаллаах дуогабарга тыырыллыаҕа, оттон үрдүк үөрэҕи бүтэрбит эдэр исписэлиистэр тус сыаллаах үөрэххэ сөбүлэҥ түһэрсибит тэрилтэлэригэр баран үс сыл үлэлиир эбээһинэстэниэхтэрэ диэн иһитиннэрдэ.

Дойду үрдүк үөрэхтэригэр тутар хампаанньа 2026 сыл бэс ыйын 20 күнүттэн саҕаланыаҕа, бу күнтэн абитуриент “Работа в России” сыыппара платформатыгар, кинини кытта тус сыаллаах үөрэх сөбүлэҥин түһэрсэргэ бэлэм үлэ биэрээччини талыан сөп. Дойду ханнык баҕарар үрдүк үөрэҕин, мэдиссиинэ тэрилтэтин талыахха сөп, саамай сүрүнэ – талан ылбыт идэнэн үс сыл үлэлиэхтээхтэрин өйдүөхтээхтэр. Саҥаны киллэрии 2026 сыл кулун тутар 1 күнүттэн олоххо киириэхтээх, бу быйыл сэтинньи 17 күнүгэр 424-с нүөмэрдээх саҥа федеральнай сокуону кытта сибээстээх.

2026-2027 үөрэх дьылыгар Арассыыйатааҕы үрдүк үөрэхтэр мэдиссиинэҕэ уонна фармацевтикаҕа хайысхаларыгар специалитекка 20,2 тыһ. бүддьүөт миэстэтэ көрүллүөҕэ, ординатураҕа – 21,6 тыһ. миэстэ. ХИФУ мэдиссиинэҕэ институтугар үөрэххэ ылыы хонтуруолунай сыыппаратын бу курдук быһаарбыттар: “Эмчит дьыалатыгар” 160 бүддьүөт миэстэтэ көрүллүөҕэ, “Педиатрияҕа” – 60 миэстэ, “Мэдиссиинэ-профилактика дьыалатыгар” – 20, сиэстэрэ дьыалатыгар, стоматологияҕа, фармацияҕа 15-тии миэстэ, барыта 285 бүддьүөттэн миэстэ. Ординатура бырагырааматыгар 110 миэстэ көрүллүбүт.

“Тус сыаллаах миэстэтэ суох куонкуруһунан үөрэххэ киирэр уустук буолуоҕа диэн бэлиэтиир оруннаах. Ааспыт тутар хампаанньа түмүгэ көрдөрөрүнэн, быһа холуйан үөрэххэ туттарсааччы 70% тус сыалаах миэстэҕэ киирбит, 10-нуу бырыһыаннара – оһуобай уонна туспа кубуоталарынан. Хаалбыт 5% бүддьүөт миэстэтигэр олимпиада кыайыылаахтара уонна 100 бааллаахтар киирэллэр, онтон хаалбыт 5% миэстэҕэ баалынан куонкурустаһаллар, кинилэр 293-тэн үрдүк бааллаах буолаллар” – диэн институт дириэктэрэ этэр.

Николай Гоголев мэдиссиинэ үрдүк үөрэҕин таларга, бастатан туран, оҕо кыаҕын, сатабылын учуоттуур ордук диэн бэлиэтиир. “Ханнык баҕарар үрдүк үөрэх тэрилтэтин талыахха сөп, ол гынан баран, абитуриеннар уонна төрөппүттэр бэйэлэрин кыахтарын эрдэттэн суотаналларыгар, оҕо атын куоракка үөрэҕи тулуйуо дуо диэн толкуйдуулларыгар сүбэлиибин. Бу улахан суолталаах боппуруос: холобур, быйыл күһүн атын үрдүк үөрэх тэрилтэлэриттэн, бастакы куурус кэнниттэн биһиэхэ 15 устудьуон көстө, сорохтор үһүс куурус кэнниттэн кытта кэлэллэр. Саҥа федеральнай сокуонунан, өскөтүн эһиги тус сыаллаах үөрэххэ киирэн, 3-4 ый үөрэнэн баран бырахтаххытына, сыллааҕы үөрэҕи икки бүк төлүүр эбэһинэстэнэҕит. Бу туһунан үөрэххэ киириэххит иннинэ толкуйдуургут ирдэнэр. Мэдиссиинэ үрдүк үөрэхтэрин эриэйтиннэрин араас саастарга, платформаларга киирэн көрүөххүтүн сөп. Идэлэрин эрдэттэн толкуйдаан баран талыахтара диэн эрэнэбин” – диэн кини сүбэлээтэ.

Бу туһунан ХИФУ пресс-сулууспата суруйар. Сиһилии манна ааҕыҥ.