ХИФУ идэҕэ эрдэттэн туһаайар тэрээһинигэр 500-чэкэ киһи кытынна

Бэҕэһээ М.К. Аммосов аатынан Хотугулуу-Илиҥҥи федеральнай университекка “аһаҕас аан” күннэрэ буолла. Бу — “Сэргэлээх уоттара” култуура киинигэр университет институттара, бакылтыаттара, кэллиэстэрэ бары тутуспутунан тахсан, абитуриеннарга анаан-минээн кэпсиир, иһитиннэрэр тэрээһиннэрэ.  

“Сынньалаҥ кэмигэр куорат үөрэнээччилэрэ дэриэбинэҕэ, өрөспүүбүлүкэ тас өттүгэр сынньана баран аҕыйахтар быһыылаах. Ол оннугар чугастааҕы Бүлүү, Үөһээ Бүлүү, Мэҥэ Хаҥалас, Чурапчы, Сунтаар, Горнай, Нам, Хаҥалас улуустарыттан элбэх киһи  кэлбит. Былырыын үөрэх кэмигэр ыыппыппыт, чугас улуустар туруорсууларынан быйыл күһүҥҥү сынньалаҥ кэмигэр тэрийдибит. Тохсунньуга орто анал үөрэҕи бүтэрбиттэргэ анаан иккис түһүмэҕи ыытар былааннаахпыт. Оскуола үөрэнээччилэригэр сааһыары массыына суола хаалыан иннинэ эмиэ ыытыахпыт”, — диэн ХИФУ киин тутар хамыыһыйатын начаалынньыга Елизавета Ильина иһитиннэрдэ.

Кэлин физикаҕа биир кэлим эксээмэни туттарар оҕо ахсаана аҕыйаан иһэр диэн этэллэр. Дьиҥэр, физиканы туттарбыт оҕо аана аһаҕас, үрдүк хамнаһы аахсар, олоҕун хааччынар кыахтаах эбээт.

Тустаах боппуруоһунан Физика-тиэхэньиичэскэй институт идэҕэ туһаайыыга эппиэттээх үлэһитэ, иитэр үлэҕэ институт дириэктэрин солбуйааччы Виктория Лонгинованы кытта кэпсэтэн аастым.

“Номнуо отучча оҕо кэлэн ыйыталаста. Сэргииллэрэ биллэр. Кэлин физиканы талар оҕо аҕыйаата. Биһиги санаабытыгар, манна чаас аҕыйаҕа таайар. Нэдиэлэҕэ биир-икки эрэ уруоктаахтар. Ити аҕыйах чаас иһигэр оҕо элбэҕи үөрэппэтэ биллэр. Физика, университет үрдүнэн тиэхэньиичэскэй исписээлинэстэргэ барытыгар баар, алын баал 39. Маны таһынан уустугурдуллубут (профильнай) математика ирдэнэр, алын баал эмиэ 39 буолар. Инженернэй хайысхаларга информатиканы эбэтэр физиканы талыахтарын сөп. Биһиэхэ инжернэй исписээлинэстэргэ куонкурус арыый улахан буолааччы. Кэлин киин куораттарга баран үөрэнэр баҕалаах оҕо үксээтэ. Ол эрээри, биһиги университеппыт хаачыстыбалаах тиэхэньиичэскэй үөрэҕи биэрэр, оҕолор ХИФУ-га кэлэн туттарсалларыгар ыҥырабыт” – диэн Виктория Яновна кэпсиир.

ХИФУ идэҕэ эрдэттэн туһаайыы тэрээһинин ыытара үтүө үгэскэ кубулуйда. Хас биирдии институт, бакылтыат, орто үөрэхтэр кэлэн оҕолор, төрөппүттэр ыйытыыларыгар сиһилии хоруйдаатылар, сүбэ-ама биэрдилэр, үөрэнээччигэ идэ туһунан өйдөбүлү иҥэрэр туһугар көннөрү брошюраттан саҕалаан, көрдөрөр-иһитиннэрэр тэриллэрэ да үгүс.

Бу кэмҥэ саалаҕа, мин киирэн тахсарбар, олимпиадалар, эбии баалы ылыы кистэлэҥнэрин туһунан кэпсии тураллара. Үөрэххэ туттарсыы быраабылаларыгар уларыйыылар туһунан оҕо маҥнай мантан истэн билэр. Онон үөрэххэ туттарсааччыларга бары өттүнэн табыгастаах, туһалаах тэрээһин.