ХИФУ лиссиэйигэр үөрэниэн баҕалаахтартан сайабылыанньалары ылаллар

М.К. Аммосов аатынан Хотугулуу-Илиҥҥи федеральнай университет  Анал үөрэтэр-билим киинигэр – университет лиссиэйигэр киириэн баҕалаахтартан сайабылыанньалары туталлар.

Быйыл 10-с кылааска физика-тиэхэньиичэскэй, математика уонна ИТ, химико-технологическай, биолого-экологическай, лингвистическэй хайысхалар аһыллаллар. Лиссиэй үһүс түһүмэххэ (поток) докумуоннары атырдьах ыйын 22 күнүгэр диэри ылар. Эксээмэннэр атырдьах ыйын 24-28 күннэригэр буолуохтара.

Тургутуу икки түһүмэҕинэн (этап) барар:

— бастакы түһүмэх – икки профильнай биридимиэккэ суругунан эксээмэн. Тутар хамыыһыйа көрүүтүнэн эксээмэн суругунан уонна тылынан чаастаах буолуон сөп;

— иккис түһүмэх – лиссиэйгэ туттарсааччылары уонна кинилэр төрөппүттэрин (сокуоннай бэрэстэбиитэллэрин) кытта сэһэргэһии. Манна оҕолор 7-9-с кылаастааҕы портфолиоларын аҕалыахтаахтар.

“Үөрэнээччилэр туттарсар биридимиэттэригэр билиилэрин хаҥатар уонна үөрэххэ туттарсар эксээмэннэргэ бэлэмнэниир соруктаах ХИФУ анал үөрэтэр-билим киинэ, атырдьах ыйын 21-23 күннэригэр сайыҥҥы оскуоланы тэрийэн ыытар.

Дьарыктар маннык хайысхаларынан бараллар: математика, физика, информатика уонна ИКТ, биология, химия, аангылыйа тыла нуучча тыла. Сайыҥҥы оскуолаҕа сайаапканы бу сыл атырдьах ыйын 20 күнүгэр, киэһэ 18 чааска диэри ыыталлара ирдэнэр”, — диэн ХИФУ Анал үөрэтэр-билим киинигэр иһитиннэрдилэр.

Сайаапканы Leader-ID: https://leader-id.ru/events/443797 платформа нөҥүө ылаллар. Сиһилии (4112) 49-68-75 (10:00-14:00 чааска диэри) төлөпүөнүнэн эбэтэр +7 924 565-51-81 билсиэххитин сөп.

ХИФУ анал үөрэххэ-билимҥэ киинэ 2016 сыллаахха аһыллыбыта. Өрөспүүбүлүкэҕэ биир тарбахха баттанар лиссиэйинэн биллэр. Үөрэнээччилэрэ олимпиадаларга ситиһиилээхтик кытталлар, билимҥэ үлэнэн умсугуйан дьарыктаналлар, үрдүк үөрэххэ хото киирэллэр.