Хируурдар осколочнай бааһырыы кэнниттэн эр киһи төбөтүн уҥуоҕун чөлүгэр түһэрдилэр

 Алдан улууһугар быраастар анал байыаннай дьайыы кыттыылааҕар осколочнай бааһырыы кэнниттэн төбөтүн уҥуоҕун чөлүгэр түһэрдилэр.

Эпэрээссийэни оҥороору Алдаҥҥа 2 №-дээх Өрөспүүбүлүкэтээҕи балыыһа – Суһал көмө киинин (РБ № 2 — ЦЭМП) көһө сылдьар хируурдара тиийдилэр.

Ыарыһах эпэрээссийэни хайдах тулуйбутун туһунан ЯСИА-ҕа нейрохирург-быраас Максим Макиевскай кэпсээтэ. 56 саастаах эр киһи 2024 сыл тохсунньутугар төбөтүн уҥа өттүгэр осколочнай бааһырыыны ылбыт. «Кинини фроҥҥа чугас эмтиир тэрилтэлэргэ суһаллык эпэрээссийэлээбиттэрэ. Буулдьаттан сылтаан киниэхэ төбөтүн уҥуоҕар дефект үөскээбит. Соторутааҕыта биһиги ону Алданнааҕы киин балыыһаҕа туораттыбыт. Пластическай эпэрээссийэ ыытылынна, төбөтүг уҥа өттүнээҕи сүүһүн уобалаһыгар уҥуоҕар титан пластина угулунна. Эпэрээссийэ этэҥҥэ ааста, ыарыһах балыыһаттан тахсарга бэлэм», – диэн ЯСИА-ҕа нейрохирург-быраас, көһө сылдьар хируурдар биригээдэлэрин салайааччыта Максим Макиевскай кэпсээтэ.

Үксүгэр маннык эпэрээссийэҕэ наадыйар ыарыһахтары Дьокуускайга ыыталлар. Өрөспүүбүлүкэ улуустарыгар краниопластиканы көһө сылдьар хируурдар 2025 сылтан оҥорор буоллулар. Бары үнүстүрүмүөннэрин уонна ороскуоттанар матырыйаалларын быраастар бэйэлэрэ илдьэ кэлэллэр, анал тэрил наадата суох.

«Төбөтүн уҥуоҕун дефегын туоратар эпэрээссийэ эчэйии уонна инсуул кэнниттэн ыалдьыбыт дьоҥҥо оҥоһуллар. Бу эпэрээссийэ бэрт судургутук ааһар. Саамай сүрүнэ – мэйии бүрүөтүн арыйыыттан уонна инфекция киириититтэн сэрэнии. Арыллыбыт дефекка титан пластина оҥоһуллан, үрдүнэн ууруллар уонна биинтэнэн хатарыллар. Кэлин бу пластина уҥуохха үчүгэйдик иҥэр, таһыттан букатын көстүбэт. Пластина магнитнай буолбатах, онон ханнык да детектордар ону булбаттар. Тимири организм ылыммат түбэлтэтэ суох кэриэтэ, ыарахаттар олус сэдэхтик көстөллөр. Быйыл улуустарга маннык эпэрээссийэни аҕыс ыарыһахха оҥордубут», – диэн Максим Макиевскай эбэн эттэ.

Көһө сылдьар хируурдар ураты бырайыактара СӨ Айсен Николаев ыйааҕынан 2024 сыл тохсунньутугар саҕаламмыта. Быраастар өрөспүүбүлүкэ улуустарыгар араас көрүҥнээх эпэрээссийэлэри оҥороллор, оттон ыарыһахтары хируурдар кэлиилэригэр киин улуустааҕы балыыһалар быраастара бэлэмнииллэр. Холобур, Алдан улууһугар анестезиолог-реаниматолог быраастар, тымыр хирура, травматолог-ортопед, колопроктолог, хирург-быраас уонна оториноларинголог үлэлээтилэр. Көмө хааччахтаммыт усулуобуйатыгар, быраастар хас биирдии кэлиилэрэ ыраах улуустар олохтоохторугар дьиҥнээх түгэнинэн буолар. Сыл бүтүөр диэри 2 №-дээх РБ – СМЭК быраастара Арктика улуустарыгар барыахтара. Былааҥҥа – Үөһээ Дьааҥы, Булуҥ уонна Орто Халыма улуустара. 2025 сыллаахха кылаабынай быраас Иван Иванов салайааччылаах 2 №-дээх РБ – СМЭК исписэлиистэрин биригээдэлэрэ өрөспүүбүлүкэ 13 улууһугар 17 төгүл сырыттылар. 1500-тан тахса киһи консультацияны ааста, 700-кэ кэриҥэ эпэрээссийэ оҥоһулунна.