Хаартысканы тэрилтэ тиксэрдэ.
Мэҥэ Хаҥалас улууһун Хочо бөһүөлэгин килбэйэр киинигэр 3 этээстээх таас дьиэ тутуллан дьэндэйэн эрэрэ тута харахха быраҕыллар. Бу дьиэни тутуу былырыын 2022 сыл кулун тутар ыйыгар саҕаламмыта. Дьиэ тутуллан бүттэҕинэ, «Хаарбах дьиэттэн дьону көһөрүү» федеральнай бырагырааманан 23 ыал киирэрэ былааннанар.
Тутуу хаамыытын туһунан кылаабынай инженер Иннокентий Олегович Устинов бу курдук кэпсээтэ: «Бу дьиэни тутуунан «Сахастройсервис» ХЭУо дьарыктанар. Каркаснай-монолитнай ньыманан тута сылдьабыт. Дьиэ толору хааччыллыылаах буолуохтаах: носуос ыстаансыйата, резервуардар, вентиляция, санузел – барыта оҥоһуллар. Кимнээх үлэлииллэрий диир буоллахха, сыбаайаны «Таммастрой» ХЭУо оҥорбута; кылааккаҕа, таҥар үлэлэргэ олохтоох уолаттар үлэлииллэр. Таҥар үлэҕэ олохтоохтор үлэлииллэрэ биһирэнэр эрэ: тоҕо диэтэххэ, кэлин алдьаныы-кээһэнии тахсар да түбэлтэтигэр бэйэлэрэ өрөмүөннүөхтэрин наада.
Уолаттар бары даҕаны, илиилэрин араарбакка, бэркэ үлэлии сылдьаллар. Ордук чорботон бэлиэтиэхпин баҕарабын Александр Уломжинскайы, Алексей Никаноровы, Пивовар Сивцеви, Николай Соловьёву, Борис Васильевы.
Бу күннэргэ үрүттээһин, вентиляция, канализация, фасады бүрүйүү үлэлэрэ бара тураллар. Ыам ыйыгар отделочнай үлэлэр саҕаланыахтара. Эбии 2-3 биригээдэ кэлэрэ күүтүллэр. Бу кэлэр дьону ханна олохтууру быһаарыыга олохтоох дьаһалта көмөлөһөр. Тутуу матырыйаалынан хааччыллыы үчүгэй. Үксэ тиэллэн кэлэ сытар, бытархай наадалар тутатына быһаарыллан иһэллэр. Олохтоох тырахтарыыстарга Аркадий Григорьевка, Афанасий Исаковка, Вячеслав Соколовка, Вячеслав Васильевка махталбыт улахан. Туох эбит тиэйэр-таһар үлэ таҕыстаҕына, аккаастамматтар. Кылгастык кэпсээтэххэ, итинник».
Кылаабынай инженер Иннокентий Олегович Устинов – наахаралар бэйэбит уолбут. Кини өрөспүүбүлүкэ араас муннуктарыгар элбэх тутууну ыыппыт, балай да уопут мунньуммут буолан, эрэлбит улахан.
Тутааччы уолаттар санаалара бөҕөх: өскөтүн халлаан туран биэрдэҕинэ, халаан уута мэһэйдээбэтэҕинэ, дьиэни Саҥа дьыл иннинэ киллэрэбит дэһэллэр.
Оннук эрэ буоллун, 2024 сылы Хочо бөһүөлэгин 23 ыала саҥа таас дьиэҕэ көрсүөхтэрэ диэн сэмээр күүтүөҕүҥ!
Елена Прокопьева, уопсастыбаннай кэрэспэдьиэн.
ИДьМ сулууспатын Сунтаар улууһун отделын холуобунай ирдэбил үлэһиттэрэ 24 саастаах олохтоох киһи баантан харчыны уорбутугар…
Арассыыйа Бэрэсидьиэнэ Владимир Путин пресс-кэмпириэнсийэни кытта холбоммут быһа сибээс кэмигэр дьиэ кэргэни өйөөһүҥҥэ улахан болҕомтону…
«Газпромбаан» вице-бэрэсидьиэнэ, «Үрдүкү технологиялаах мэдиссиинэ көмөтө» аһымал пуондатын сэбиэтин бэрэссэдээтэлэ Сергей Фурсенко Саха сиригэр оробуочай…
Эһиилги «Дыгын оонньууларын» чөмпүйүөнэ үс мөлүйүөн солкуобайы уонна 7 мөлүйүөн солкуобайтан тахса сыаналаах Дьокуускай куоракка…
Түөкүттэр тус дааннайдары сыыппараҕа көһөрөбүт диэн военкомакка “ыҥырар” саҥа исхиэмэни толкуйдаабыттарын ИДьМ матырыйаалларыгар сигэнэн ТАСС…
Дьокуускай олохтооҕо киһини өлөрөргө соруммутунан буруйдааҕынан билинилиннэ. Кини ритаульнай киинигэр киһиэхэ быһахтаах саба түспүт. 57…