Хоһоон куонкуруһа: Анна Николаева: «Аҕам барахсан»

“Саха сирэ” хаһыат (sakha-sire.ru) Кыайыы 80 сылынан  төрөөбүт дойдуга тапталы иҥэрэр, дойдуга бэриниилээх буолууга иитэр соруктаах хоһоон куонкуруһун биллэрбитэ. Өрөспүүбүлүкэ үгүс улуустарыттан куонкуруска уопсайа 76 кыттааччы  кытынна. Олортон бастыҥ хоһооннору талан саайтка ааҕааччыларбытыгар анаан таһаарабыт. Кыайыылаахтар ааттарын  муус устарга билиэхпит.

 

Николаева Анна Иннокентьевна, Дьокуускай к.

Аҕам барахсан

 

Аҕабын өйдүүбүн оҕо сылдьан:

Аҥаар атаҕар баттыктаах

Иһэрин ыраахтан көрөммүн

Утары сүүрэрим киниэхэ,

Итиэннэ, бу акаарычаан кыысчаан,

Аҥаар атахпар кылыйсан

Кэлсэрим тайахтан тайансан.

 

Оо, аҕам барахсан!

Уоттаах сэрии ханнык толоонугар

Хааҥҥын тоҕон, сэймэктэнэн,

Аҥаар атаххын толук ууран

Мас тайахтанан кэлбиккиний?

 

Аҕабын олуһун таптыырым,

Саамай таптыыр, атаахтатар

Орто кыыһа —  мин этим.

Олус эрдэ, сарсыарда

Тэҥҥэ турсар үһүбүн.

Өйдүүбүн ээ, мин ону:

Оһох иннин, сылаас суоһун,

Көтөҕөн олорон таҥыннарарын,

Иэдэһин бытыгын хатыытын

Кырачаан илиибинэн имэрийэрбин.

 

Аһынарым аҕабын олуһун,

Арыый улаатан иһэн.

Аҕыйах саҥалаах, көнө майгылаах,

Өйдүүбүн ээ, мүчүк гынан  үөрэн ыларын,

Ити кэннэ аргыыйдык

Баттаҕа суох тараҕай төбөтүн

Ытыһынан имэрийэн ыларын.

 

Оо, аҕам барахсан!

Ааспыт сэрии ыар тыына

Кэбирэппит эбит эн үйэҕин

Ол иһин олохтон эрдэлээн

Барбыт эбиккин  эн биһигиттэн.