Хоһоон куонкуруһа. Елена Васильева: «Эбэбэр…»

“Саха сирэ” хаһыат (sakha-sire.ru) Кыайыы 80 сылынан  төрөөбүт дойдуга тапталы иҥэрэр, дойдуга бэриниилээх буолууга иитэр соруктаах хоһоон куонкуруһун биллэрбитэ. Өрөспүүбүлүкэ үгүс улуустарыттан куонкуруска уопсайа 76 кыттааччы  кытынна. Олортон бастыҥ хоһооннору талан саайтка ааҕааччыларбытыгар анаан таһаарабыт. Кыайыылаахтар ааттарын  муус устарга билиэхпит.

Васильева Елена Егоровна, Эбээн Бытантай улууһа Баатаҕай Алыыта

Эбэбэр…

Таһырдьа буурҕа ыйылыыр,

Көмүлүөк симиктик сыыгыныыр,

Санааҥ арахпат таһырдьа бааллартан…

Араҥас үрдүгэр сытааччы дьоннортон…

Тыал үрэн тоҥортуо диэбиттии,

Тахсан сууларын көннөрөн киирэртэн.

Фронт, кыайыы туһугар үлэлиириҥ

Аһыыры, аһыыны барытын умнаҥҥын.

Хараҕыҥ уулара хам куура хатаннар,

Ытаабат даҕаны буола өһөҥҥүн.

Түүннэри-күннэри үлэттэн тэйбэккэ,

Төһөлөөх ыарахан кэмнэри ааспыккын

Түһээн да билэр аҕыйах буолуоҕа.

Сэрии кэмигэр төрөөбүт дьылҕалаах,

Оҕо саас кэрэтин билбэтэх,

Араҥас үрдүгэр кыһынын кыстаабыт

Кыракый дьонноргун кэпсииргин истэммин

Эйиигин аһынан ытыырым сыттыкпар

Сэрии ыар тыынын билбэтэх эн сиэниҥ.

Кыайыы күнүгэр харааста ахтабын

Тыыл дьоно ыарахан кэмнэрин,

Дьахтардыын, оҕолуун үлэҕэ мискиллэн

Кыайыыга кылааккыт биллибэт элбэҕин.

Эйэлээх олоҕу олорон кэллибит,

Эһиги ааккытын киэн тутта ааттыыбыт,

Бу сиргэ баарбыт, сылдьарбыт тухары

Махталбын этиэҕим эһиэхэ, дьоннорбор!