Хоһоон куонкуруһа. Елизавета Васильева: «Кыайыыны уһансыбыттарга сүгүрүйүү»

“Саха сирэ” хаһыат (sakha-sire.ru) Кыайыы 80 сылынан  төрөөбүт дойдуга тапталы иҥэрэр, дойдуга бэриниилээх буолууга иитэр соруктаах хоһоон куонкуруһун биллэрбитэ. Өрөспүүбүлүкэ үгүс улуустарыттан куонкуруска уопсайа 76 кыттааччы  кытынна. Олортон бастыҥ хоһооннору талан саайтка ааҕааччыларбытыгар анаан таһаарабыт. Кыайыылаахтар ааттарын  муус устарга билиэхпит.

Васильева Елизавета Ивановна, Дьокуускай

Кыайыыны уһансыбыттарга сүгүрүйүү

Бэйэм дьоммун санааммын,

Бэтэрээннэргэ анааммын,

Хоммут уоспун хоҥнорон,

Хоһуйарга холоннум.

Саха сирин дьонноро

Саа-саадах сэбилэнэн,

Самныбат саргы туһугар

Сэриигэ бартара сөбүлэнэн.

Оҕо-аймах, кырдьаҕас,

Кыаммат өттө хаалбыта,

Үлэ фронун тэрийэн,

Күүс-көмө буолтара.

Сэрии ыар кэмнэрэ

Өр бүрүүкээн туртара,

Өлүү-сүтүү суруктара

Ыал аайы кэлтэрэ.

Уоттаах сэрии толоонугар

Улусхан уохтарын киллэрэн,

Уоскулаҥ диэни билбэккэ,

Уордаах өстөөҕү кыайтара.

Өлбөөдүйбэт күнү ыппыт

Өстөөхтөр эстибиттэрэ,

Сулустуу күлүм тыкпыт

Саллааттар тиллибиттэрэ.

Бэтэрээн түөһүгэр кытыастар

Хорсун-хоодуот бэлиэтэ,

Ийэ дойдутун иннигэр

Бэриниилээх мэктиэтэ.

Өйдүү-саныы сылдьыахпыт

Сэрии уотугар умсубуттары,

Барҕа махталынан саныахпыт

Кыайыыны уһансыбыттары.

Көҥүл тыынан, күлэн-үөрэн,

Ил-эйэ уйатын тутан,

Дьол-соргу аргыстаах

Олохпутун түстүүбүт.

Кыргыс уота кыыспатын,

Өһөх хаан халыйбатын,

Ыар ынчык иһиллибэтин,

Төлкөбүт түҥнэстибэтин.

Уруй-айхал буолуохтун,

Уруй-тускул этиэхтин

Уоттаах сэрии түмүгэр –

Улуу Кыайыы күнүгэр!