Хоһоон куонкуруһа: Иннокентий Попов: «Иҥнэйбит сэргэ»

“Саха сирэ” хаһыат (sakha-sire.ru) Кыайыы 80 сылынан  төрөөбүт дойдуга тапталы иҥэрэр, дойдуга бэриниилээх буолууга иитэр соруктаах хоһоон куонкуруһун биллэрбитэ. Өрөспүүбүлүкэ үгүс улуустарыттан куонкуруска уопсайа 76 кыттааччы  кытынна. Олортон бастыҥ хоһооннору талан саайтка ааҕааччыларбытыгар анаан таһаарабыт. Кыайыылаахтар ааттарын  муус устарга билиэхпит.

Попов Иннокентий Петрович,  Уус Алдан улууһа  Суотту

Иҥнэйбит сэргэ

Өбүгэм өтөҕөр кэлбитим

Урукку кэмнэри санаары,

Уһуннук соҥуоран турбутум

Иҥнэйбит сэргэттэн билээри.

Алааһы анааран көрбүтүм

Ааспыты араара ахтаары,

Айманыы күлүгэр бүкпүтүм

Амырыын сылларга төннөөрү.

Олорбут дьоннору билбитим

Оҥорон көрөммүн таайаары,

Амарах санааны сахпытым

Олоҕу кырдьыктык көрөөрү.

Үрүҥ Тунах ыһыах буолбута

Уйгулаах сайыны көрсөөрү,

Алдьархай эмискэ кэлбитэ

Амырыын сэриини кытары.

Алаас чуумпуран иһийбитэ

Эдэркээн ыччатын сүтэрэн,

Арҕаа сэриигэ атаарбыта

Алгыс тыыныгар сигэнэн.

Олох эргиччи ыараабыта,

Оҕо-дьахтар тыылга хаалбыта,

Аас-туор, сут-кураан аараабыта,

Аччыктаан хоргуйуу ыкпыта.

Олох ыарыттан толлубакка

Ыарахан кэмнэри туораары,

Аччык күннэри аахсыбакка

Эрэл санаалаах үлэлиирэ.

Олус ыардык кыайыы кэлбитэ

Өлүү-сүтүү, кыа-хаан эҥэрдээх,

Олох иһин турууласпыта

Инники кыайыыга эрэллээх.

Эйэлээх олох эргийбитэ,

Эйээркэй ырыа дьиэрэйбитэ,

Оһуохайга дьон түмсүбүтэ,

Олоххо дьол түстэммитэ.

Үтүмэн сыллары нөҥүөлээн

Үгүс кистэлэҥи иҥэрэн,

Иҥнэйбит сэргэ иитиэхтээн

Иҥиэттэн турдаҕа иһийэн.